Газетеджэхэр, къегъэцIыху лей хэмыту, зи гуащIэм щыгъуазэ артисткэщ нобэ ди тхыгъэр зытеухуар. АтIэми, абы и гъащIэм, и лэжьыгъэм, и Iуэху еплъыкIэхэм я гугъу иджыри зэ тщIыну ди къалэмыр къыдэзыгъэщтар щхьэусыгъуэ дахэщ: КъБР-м гъуазджэхэмкIэ щIыхь зиIэ и лэжьакIуэ, КъШР-м щIыхь зиIэ и артисткэ, Кавказ Ищхъэрэм ГъуазджэхэмкIэ и институтым и доцент, актёр IэзагъэмкIэ кафедрэм и унафэщI Балъкъэр Тамарэ егъэлъапIэ къыщалъхуа махуэр.
Нарткъалэ курыт еджапIэр къыщиу-ха къудейуэ, IэщIагъэ имыIэу, 1966 гъэм театрым лэжьэн щыщIидзащ Тамарэ. Iуэхум и пэр умыщIэмэ, и кIэри пщIэркъым...
ЗэрыцIыкIу лъандэрэ артист хъуну щIэхъуэпс хъыджэбз цIыкIум пхъуантэ щхьэхуэм дэлъу артист цIэрыIуэхэм я сурэтхэр зэхуихьэсырт. Апхуэдэ зы ептмэ нэхъ къищтэнут и щхьэм щыщIэдзауэ и лъакъуэм нэс пхуапэ нэхърэ. И анэр хуейт ар дохутыр хъуну, арщхьэкIэ Тамарэ хутечакъым. Москва кIуэ гъуэгум теуващ зэанэзэпхъур, арщхьэкIэ нэсыху актёр факультетым къыкIэрыхуащ. Къыхуэнэжрати, режиссёрхэр щагъэхьэзырым щIэтIысхьэу, зы илъэс дэкIмэ и нэ къызыхуикI къудамэм кIуэжыну игу ирелъхьэ. Экзаменхэри хъарзынэу ет, и мурадми егъэджакIуэ къэзыщтар щегъэгъуазэ. АрщхьэкIэ дэнэт - экзаменхэм и ужь итыху и анэр Iэджэм щIагъэдэIуауэ къыщIокI, ипхъу закъуэр Москва къалэшхуэм щыпсэуным хуэмыхьэзыру къелъытэри, «нэхъ балигъ ухъумэ къэбгъэзэжынщ» псалъэхэр щIыгъуу кърешэжьэж. Къэсыжыху щIагъуэу псэлъакъым Тамарэ, ишхаиIакъым. Нэху зэрыщу Налшык къокIуэ, театрым йокIуалIэ. И насып кърехьэкIри, актёрхэм я дэIэпыкъуэгъу гупым хагъэхьэ. «Мадинэ» спектаклыр екIуэкIырт, Мадинэ и дэлъху Алий и ролыр зыгъэзэщIар хэкIыжауэ артист яIэтэкъым. ЗанщIэу утыкум ирагъэхьэ Тамарэ, щIалэ цIыкIум и гум щыщIэр къигъэлъэгъуэн хуейуэ. «Уэ Мадинэ зездзащи сопыхьэ, гущIэм нэсу соубзэ. Згъейр си щхьэрат (мэдыхьэшх), «сыт мыгъуэм щхьэкIи сыкъэкIуа, щхьэ мы артистышхуэхэм сакъыхыхьауэ си напэр зытесхыжрэ» жыхуэсIэу. Зы бэлыхьлажьэ къыхэкIынущ жаIагъэнщ, сыкъащтащ».
ИлъэсиплIым и кIуэцIкIэ ар щыджэгуащ «Iэдииху» (Iэдииху), «Фызышэ» (Жаннэ), «Благъуэ» (Сэтэней), «Гъуэгу» (Лалуцэ), «Яшэмрэ къэзышэхэмрэ» (Гуля) спектаклхэм. Апхуэдэуи щIалэ цIыкIухэм я ролхэр абы фIэщхъуныгъэшхуэ хэлъу щигъэзэщIащ «Мадинэ», «Кремль сыхьэтхэр», «Лейр гъуркъым» спектаклхэм.
Щукиным и цIэр зэрихьэу Москва дэт театр училищэм щрагъэджэну адыгэ гуп къыхахыну еджапIэм и лIыкIуэхэр 1970 гъэм къэкIуащ ди республикэм. Еджэну зэрыхуейр, Iэмал къызэрыкъуэкIыу щIэтIысхьэну зэримурадыр яриухылIа пэтми, театрым и унафэщIхэм къыхуамыдэу къэуващ: «Дауэ, узыхэт спектаклхэр зэрыхъунум уегупсыса? Абы узэрыщыIэну илъэситхум щIыхьыцIэ уиIэнущ уэ». Зи хъуэпсапIэхэр ерыщу зыIэрызыгъэхьэу еса хъыджэбзыр Калиновский Леонид бгъэдыхьащ икIи жриIащ Москва кIуэну, щIэныгъэ зригъэгъуэтыну хуабжьу зэры-хуейр, ауэ зэрамыутIыпщыр. Утыкум иригъэхьэри и зэфIэкIым еплъащ. «Уздэсшэнущ къалащхьэм, умыгузавэу кIуэ спектакль щывгъэлъэгъуэну къуажэм». Дауэ джэгуами ищIэжыркъым Тамарэ, Налшык къыдыхьэжащи, Фырэ Руслан, Щыхьэлы Толэ, Шыбзыхъуэ Басир, КIэмыргуей Валентин сымэ къыжраIэ «5» къызэрахьар, езым щхьэкIэ щеупщIым, «фIы дыдэ» къихьауэ къыщIокI. «Зэхуашэса адыгэ студием хэтхэм я цIэ-унэцIэр къызыфIадза пхъэбгъум дапщэрэ сыIухьат си нэм илъагъур си фIэщ мыхъуу», - игу къегъэкIыж Тамарэ.
Нэхъуеиншэу еджащ а илъэситхум Балъкъэрыр, къыжраIэри кърагъэлъагъури фIэщIэщыгъуэт, щIэныгъэ нэхъыбэ къалэшхуэм къызэрыдихыным яужь итт. 1975 гъэм абы училищэр къиухащ драмэ театрымрэ киномрэ я артист IэщIагъэр иIэу. Диплом лэжьыгъэхэу лъэпкъ театрым къашэжа «Бжэхэр», «ЕпщыкIутIанэ жэщ», «Ипполит» спектаклхэм, водевилхэм хэтт ар. Зэман дэкIри, Балъкъэр Тамарэ Молдавием Iэпхъуэн хуей хъуащ. Чехов А. П. и цIэр зэрихьэу Кишинёв дэт Урыс республикэ театрым илъэс 13-кIэ щылэжьащ, а къалэм ГъуазджэхэмкIэ и институтым щригъэджащ, актёр-режиссёр гуп, я художественнэ унафэщIу щыту, еджапIэм къыщIигъэкIащ Тамарэ.
Бланэ щалъху йокIуэлIэж жыхуаIэрати, Балъкъэрым Налшык 1998 гъэм къигъэзэжауэ, нобэр къыздэсым ЩоджэнцIыкIу Алий и цIэр зезыхьэ Къэбэрдей къэрал драмэ театрым щолажьэ. Абы игъэзэщIащ роли 100-м щIигъу, спектакль, художественнэ фильм, телефильм куэдым щыджэгуащ. Апхуэдэхэщ Кайтовым и «Анэм и гур», Гоголь и «Фызышэ», Эдуардо де Фелиппо и «Фелуменэ Мартуранэ», «ЦIыхущ икIи джентльменщ», Шатров и «Революцэм и цIэкIэ», КIыщокъуэм и «Иужьрей гъуэгуанэ», Шекспир и «ЕпщыкIутIанэ жэщ», Чхеидзе и «Сыхьэтищым къыщыщIэдзауэ хы хъуху», Пьеро и «Вакъэ зылъыгъ джэду», Журтым и «Хъупынэ и хьэгъуэлIыгъуэ», IутIыжым и «Эдип», Лохвицкэм и «Уафэгъуагъуэ макъ», Мамийм и «Псэлъыхъухэр», Ольмезовым и «Унэ лъапIэ» спектаклхэр, «Расстанемся пока хорошие», «Узлы» художественнэ фильмхэр, «Линия фрон-та», «Всадник», «Грустные сны детства», «Лъагъуныгъэм и къарур», «Псэууэ къэгъэзэж, папэ» телефильмхэр, нэгъуэщIхэри.
Кавказым ГъуазджэхэмкIэ и институтыр къызэрызэIуах (1990) лъандэрэ щрегъаджэ Тамарэ. А зэманым къриубыдэу абы къыщIигъэкIащ актёр курсу 8, абыхэм ящыщу тIур адыгэ гупщ. Тамарэ и гъэсэнщ Урысей Артиадэм и лауреат, КъБР-м щIыхь зиIэ и артисткэ КIэхумахуэ ФатIимэ, ТIыхъужь Алий и цIэкIэ щыIэ саугъэтыр зыхуагъэфэщахэу Бейтыгъуэн Жамболэтрэ ХьэхъупащIэ ФатIимэрэ, Къэзанш Джульеттэ, Молэ Iэулият, ТIымыжь Владимир, Къул Марьянэ, Шыдгын Тимур сымэ, Илъэсым и егъэджакIуэ хъуа Хур Мадинэ. Балъкъэрым и студентхэр щолажьэ Москва, Санкт-Петербург, Красноярск, Уфа, Молдавием, Белоруссием, Украинэм, Ирландием, Америкэм.
КъызэщIэпкъуэжу жыпIэмэ, Балъкъэр Тамарэ театр лэжьыгъэм илъэс 57-рэ, егъэджэныгъэ Iуэхум 33-рэ хъуауэ пэрытщ.
ЩыIэкъэ къыхиха IэщIагъэр имейуэ къыщIэкIыу, ауэ хуэмыхъуэжурэ гугъу иригъэхьу, гукъыдэжышхуи къримыту. Апхуэдэу къыщыщIэздзэкIэ Тамарэ и щхьэр егъэкIэрахъуэ. «Нобэ къыщIэздзэжрэ сыпсэуами, нэгъуэщI IэщIагъэ къыхэсхынутэкъым, - къызжеIэ си псэлъэгъум. - Си лэжьыгъэр си дежкIэ зищIысыр кърисщIэну зы Iуэхугъуэ къысщыщIащ, Залинэ. Институтым кафедритI щысIыгъыу, театрми сыщыIэу, си анэшхуэмрэ си анэмрэ жьы хъуауэ, си щIалэр школакIуэу Iейуэ гугъу сехьырт. ЕгъэджакIуэхэм загъэпсэхуауэ, апщIондэху сэ театрым сыщылэжьауэ, приёмнэм щызиIэ къалэнхэр сухри планхэм, отчетхэм я ужь сихьауэ: «Зы тхьэмахуэ закъуэ зызгъэпсэхуащэрэт», - жысIащ сигуми си псэми къыбгъэдэкIыу. ЩэкIуэгъуэ мазэм и пэщIэдзэу институтым сыздэкIуэм, еджапIэ бжэIупэм сыщыщIэцIэнтхъукIщ, сыджалэри, си лъакъуэр къутащ. МазихкIэ дэлъащ гипсым, диплом лэжьыгъэхэм еплъын хуейуэ сыкъыщыдашыжам иджыри башитIыр сIыгът. Ар щIыжысIэращи, ныскIэлъыкIуэр куэдми, зэшыпIэ къызамытми уи фIэщ хъунтэкъым сэ театрми егъэджэныгъэ Iуэхуми зыкIэ сыхуэзэшати. Псалъэм къаруушхуэ иIэщ, абы хуэсакъын хуейщ».
Гъуазджэм и щытыкIэр къызэрыщыхъум, абы хилъхьэну зыхуейм сыщыщIэупщIэкIэ Тамарэ къызжиIэращ: «Театрым щылэжьэну актёрхэр зыгъэхьэзыр ди институтым къыщожьэ абыхэм я щэнри, хабзэри, гъуазджэри. Зы дерс къанэркъым сэ абыхэм цIыхугъэм, хабзэм, гъэсэныгъэм, нэгъуэщI хьэлыфIу адыгэм къыдекIуэкIхэм я гугъу яхуэзмыщIу. Фестиваль, зэIущIэшхуэ щекIуэкIкIэ ягъэщIагъуэ ди сабийхэм яхэлъ гъэсэныгъэр, «адрейхэм дакъыхэзыгъэщ дахагъэхэм дахуэвгъэсакъ» яжызоIэ абыхэм зэпымыууэ. Дыкъэзылъхуахэм яIыгъа нэмысырщ ди къулеигъэ нэхъыщхьэр, ди лъым хэлъыр, тхъумэн хуейр. Ахэр зыхалъхьэмэ, шэч хэмылъу, адэкIи ягъэкIуэтэнущ, я бынхэми халъхьэну яужь итынущ. Сэ сыпсэуху сценэм емыкIу щезгъэгъэувынукъым. Гулъытэм, шыIэм, хабзэм, абы и зехьэкIэм нэхъ IэмалыфI щыIэкъым цIыхур зыщIэбгъэгупсысыжынымкIэ. Театреплъыр и махуэ къэс Iуэхухэм къыхэтшрэ зедгъэгъэпсэхуфмэ, гугъэ еттрэ фIэщхъуныгъэ хэтлъхьэфмэ - ди къалэным дыпэлъэщу аращ».
Куэд щIауэ псалъэмакъыу къокIуэкI адыгэбзэкIэ тха тхыгъэм спектакль нэхъыбэ ди лъэпкъ театрым къытрищIыкIмэ нэхъыфIу. Абы ехьэлIауэ и Iуэху еплъыкIэр къасщIэмэ сфIэигъуэу Тамарэ сыщеупщIкIэ къызжеIэ пыухыкIауэ абы жэуап зэрыпхуемытынур. «Лъэпкъым и гупсысэкIэм щытемыхуэм и деж лэжьыгъэр театреплъым и гум дыхьэркъым, аращ адыгэбзэкIэ тха нэхъыфIщ жаIэми щIыжаIэр. Ауэ хьэлрэ хабзэ-бзыпхъэкIэ къыттехуэ лъэпкъхэм ятха тхыгъэхэр къапщтэми ущыуэнукъым, зи гугъу ищI Iуэхур тпэгъунэгъумэ. Ауэ щыхъукIи, зыми драматург хьэзыр къуитынукъым, зыгуэр ятхыхэрэ - гъэувын хуейщ. ИтIанэщ абыхэм тхэну гукъыдэж щаIэнур. Псалъэм и хьэтыркIэ, зэхьэзахуэ гуэрхэр ирагъэкIуэкIауэ иджыпсту Къэрэшей-Шэрджэсым, Адыгейм, ди республикэм щыщу Къаныкъуэ Заринэ сымэ я пьесэхэр игъэувын хуейщ театрми, тлъагъуну си гуапэщ. Си щхьэкIэ къэсщтэнщи, узыгъэгупсысэ лэжьыгъэхэр сфIэфIщ. Иджыпсту театрым щекIуэкI «Унэ лъапIэр» (зытхар Ольмезов Мурадинщ), Хьэмыкъуэ Олег триха «Гузэры-дзэ» фильмыр сыт я уасэ! Олег хуэдэ ныбжьыщIэ губзыгъэхэр диIэмэ, лъэпкъым зиужьыну, ар ефIэкIуэну къысщохъу».
Балъкъэр Тамарэ и ехъулIэныгъэу ищхьэкIэ зи гугъу тщIахэм, къыхуащIа гулъытэхэм ящыщщ и лэжьыгъэфIым папщIэ къыхуагъэфэща медалхэр, КъБР-м Къэрал кIуэцI IуэхухэмкIэ и министерствэм, Парламентым, СССР-м, КъБР-м ЩэнхабзэмкIэ я министерствэхэм, Театр лэжьакIуэхэм я зэгухьэныгъэм я щIыхь тхылъхэр къызэрыратар. Абы и цIэр иратхащ ЮНЕСКО-м и нэIэм щIэту Франджым къыщыдэкIа «Универсальный словарь творческих женщин» томищ хъу тхылъым. Ауэ нэхъыщхьэр абы и цIэр цIыхугухэм зэрилъырщ, и зэчийм, и емызэшыж лэжьыгъэм пщIэ зэрыхуащIырщ, ди щIыналъэми нэгъуэщI щIыпIэхэми къыщацIыху IэщIагъэлIу зэрыщытырщ.
Ди гуапэщ и IэщIагъэкIи, и унагъуэкIи, и мурадкIи, и хъуэпсапIэкIи ехъулIэныгъэ иIэну, емызэшу, узыншэу дяпэкIи къызыхэкIа лъэпкъым хуэлэжьэну.
ИСТЭПАН Залинэ.