КъМР-ни Башчысыны къуллугъун болжаллы халда толтургъан Казбек Коков Правительствону юйюнде Иордания Королевствону Россей Федерацияда Энчи эмда Толу эркинликли Келечиси Амджад Адайле бла тюбешгенди. Сыйлы къонакъ бизни республикагъа къырал жумуш бла келгенди. Ушакъны кезиуюнде ала экономика жаны бла бирге ишлеуню къайсы бёлюмледе кючлендирирге боллугъуну юсюнден сёлешгендиле. Эл мюлк, туризм эмда курорт-рекреация жаны бла ишчи байламлыкъланы айнытырча амалла кенг болгъанларын чертип айтхандыла.
Энчи эмда Толу эркинликли Келечи Къабарты-Малкъарны башчыларына, республиканы битеу жамауатына Иорданияны Королю Абдалла Экинчини атындан салам бергенди, къыйматлы байламлыкъланы андан ары кючлендире барыргъа хазырлыкълары ючюн жюрек ыразылыгъын билдиргенди. «Иорданияны бла Къабарты-Малкъарны араларында тарых байламлыкъла эрттеден бери келедиле. Бюгюнлюкде биз регион бла экономика жаны бла бирге ишлеуню кючлендириуню дурус кёребиз»,-дегенди ол.
-Россейни бла Иорданияны араларында шуёх халладан, къыралларыбызны башчыларыны бир бирге хурмет этиулеринден юлгю алабыз эмда республикагъа жетген жумушланы чеклеринде бирге ишлеуню кючлендириуге кесибизни юлюшюбюзню къошаргъа хазырбыз,- дегенди Казбек Коков.
Тюбешиуге Иорданияны Россей Федерацияда Посольствосуну биринчи секретары Мутасем Альбашир, КъМР-ни баш федерал инспектору Евгений Ткачев, РФ-ни Тыш къыралла бла ишлерини министерствосуну Минеральные Воды шахарда келечисини къуллугъун толтургъан Мария Крутинева, КъМР-ни Правительствосуну Председателини орунбасары Мурат Карданов, КъМР-ни экономиканы айнытыу министри Рахайланы Борис да къатышхандыла.