Газетибизде къууанчларыбызны, бушуу кюнлерибизни да жорукъла бла тийишлиликде ётдюрюрге кереклисини юсюнден аслам материал басмалагъаныбызны сиз да эслей болурсуз. Бу зат неденди десек, адамла бир бирлерине асыры эришгенден, кёп керексиз жумушла этедиле. Бютюнда ёлюмню юсюнде. Аны себепли, мен оюм этгенден, бек биринчиден, динни бла адетлени бир бирден айыра билиуню магъанасы уллуду. 

Адетле терс, тюз эселе да, аланы хар ким да кесини акъылына кёре жюрютедиле. Динни алып къарасакъ, Къуранда тохташдырылгъан жорукъланы, файгъамбарны хадислеринде айтылгъан оюмланы жашауда бардырыу хар бирибизге да борчду. Алай эсе, «Хар элни да къой союуу башха», -деп таулула айтханлай болмай, ол жорукъланы бирча тамамларгъа нек жарамайды? 

Динни юсюнден бусагъатда къайда да кёп информация табаргъа болады. Дагъыда тийишли билимлери болгъан адамларыбыз да бардыла. Алай аланы айтханларына эс бёлгенле уа аздыла. 

Барыбыз да билгенден, ёлюмню юсюнде оноуну асламында тиширыула этедиле. Аны бла бирге уа дин жорукъла да бузуладыла. Базарлагъа, тюкенлеге барып, малла союп, бир уллу къууанчха хазырланнганча, аш къангаланы жасалайдыла. Динде уа бу затла дурус тюйюлдюле. Ёлгеннге сууаплыгъы барыр ючюн садакъа эте эсек, садакъаны керекли жерине жетдирирге уллу кёллю нек болабыз. Садакъаны берир ючюн энчи бир кюнлени сакълау да терсди деп жазылады, аны юсюнден эфендиле да айтадыла. Сора ала бу ишни юсюнде жууаплылыкны кеси боюнларына алгъан эселе, биз алагъа нек тынгыларгъа керек тюйюлбюз. 

Байла ырысхыларын сыйындыралмагъандан иги садакъа эте эселе, къолайлары уллу болмагъан къоншулары да алагъа эришип, юйюрлерин да ачдан ёлтюрюп, ёнкючлеге киредиле. Алай динде айтылгъаннга кёре, кесини юйюнде ач адамы тургъанлай садакъаны тышына чыгъарыу дурус тюйюлдю. Аны унутургъа жарамайды. 

Дагъыда бир зат. Къайгъы аш бериу, алыу… Бу зат да сейир шартладан бириди. Сёз ючюн мен гитче заманда, 80-чи жылланы аллында, анабыз къайгъы ашха бал туз, пиринч дегенча мирзеу продукция элтиучюсю бюгюнча эсимдеди. Бирле бишлакъла да. Арт отуз жылда уа тиширыула аны орунуна ахча жюрютедиле. Сора жик дууа кюн а ары келип, хуржунла сакълайдыла. Жетмей къалгъанда, къаугъа ачхан юлгюле да, жарсыугъа, белгилидиле. Ол а ёлгени болгъаннга болушлукъ болмайды, аны талагъаннга ушайды бу иш. Къайгъы аш борчха берилмейди… 

Ёлгеннге садакъа юлешине туруп, ол тюрлю айыплы ишле бола эселе, аны кимге къалай ангылатыргъа боллукъду. Эфендиле, элни жамауаты да андан оюм этерге, шериат бла этилирге тийишли жумушла тамамланырыны ючюн къайгъырыргъа керекдиле. Алайсыз динни аты бла этилген адетледен къутулургъа къолубуздан келлик тюйюлдю деп, оюмум алайды.

Къасымланы Аминат.