Бу кюнледе бизни республикада «Бизнес 07» деген ат бла стартап-школа ачылгъанды. Аны КъМР-ни Жаш тёлюню ишлери жаны бла министерствосу къурагъанды. Анга «Иш кёллю Россей» жамауат организацияны келечилери Таумырзаланы Салидат бла Гузеланы Индира да къатышхан эдиле.

«Бизнес 07» - хакъсыз билим бериу проектди. Аны чеклеринде окъуучуланы (14-35 жыллыкъланы) бизнес къураргъа, сатыу этерге, финансла эмда юридический жаны бла халатладан къутулургъа, налогланы эмда бухгалтерияны иги билирге юйретедиле. Дагъыда инвесторла бла сёлешиуню эмда презентация къурауну жашырынлыкъларын туура этерикдиле.

Школну ачыу жыйылыугъа сагъынылгъан министерствону башчысы Азамат Люев, сатыу-алыу-промышленность министр Шамиль Ахубеков, Экономиканы айнытыу министерствону, бизнес биригиулени келечилери да къатышхан эдиле.

Биринчи дерс ол кюн окъуна ётгенди. Анда уа жаш адамлагъа предпринимательни ишини, маркетингни, сатыу этиуню юсюнден айтхандыла.

Гузеланы Индира бренд къурауну эмда бизнесни жарашдырыуну юсюнден айтырыкъды. Таумырзаланы Салидат а проектлени айырыу комиссияны къауумунда ишлерикди.

Улбашланы Мурат хазырлагъанды.