«1100 гравюр» фIэщыгъэм щIэт гъэлъэгъуэныгъэм и етIуанэ Iыхьэр Налшык дэт Лъэпкъ музейм иджыблагъэ къыщызэIуахащ. Фигу къыдогъэкIыж абы и япэ Iыхьэр Ткаченкэ Андрей и цIэр зезыхьэ СурэтыщI гъуазджэхэмкIэ музейм тхьэмахуэ ипэ къызэрыщызэIуэхар, ауэ абы утыку къыщрахьахэр нэгъуэщIщ.
УФ-м и цIыхубэ, КъБР-м щIыхь зиIэ я сурэтыщI, республикэм и Къэрал саугъэтым и лауреат, ХудожествэхэмкIэ Урысей Академием и член-корреспондент, ЩIДАА-м и академик, Красноярск КсилографиемкIэ щыIэ школым и къызэгъэпэщакIуэ икIи и унафэщI, профессор Пащты Герман утыку кърихьар езым и лэжьыгъэщIэхэм я закъуэкъым, атIэ и гъэсэн цIыкIухэм я IэдакъэщIэкI гъэщIэгъуэнхэми нэIуасэ дахуищIащ.
Музейм и пэшхэм щыфIэдза сурэтхэр ХудожествэхэмкIэ Урысей академиер, Красноярск художествэмкIэ дэт къэрал институтым, Хворостовский Дмитрий и цIэр зэрихьэу Красноярск дэт гъуазджэхэмкIэ институтым графикэм щыхуеджахэмрэ абы IэщIагъэ щызэзыгъэгъуэтахэмрэ я IэдакъэщIэкIщ.
КъБР-м щэнхабзэмкIэ и министр Къумахуэ Мухьэдин къыщыпсалъэм Пащтым фIыщIэ хуищIу жиIащ:
-Тхыдэм къыхэнэну Iуэхугъуэ дахэм дыхэтщ нобэ. Ар дэ нэсу къыщыдгурыIуэнур зэман дэкIмэщ. Пащты Германрэ абы и гъэсэнхэмрэ ди республикэм лэжьыгъэ 1100-рэ тыгъэ къыхуащIащи. А сурэт гупым Пащтым и цIэр фIэтщыныр къезэгъыу къысщохъу.
Министрым жиIащ ди республикэм ксилографием и музей щащIыну игъуэу къызэрилъытэр.
КъБР-м и Парламентым и комитетым и унафэщI Къумал Заурбэч депутатхэм къабгъэдэкIыу Пащтым фIыщIэ хуищIащ. Абы жиIащ Пащтыми абы и гъэсэнхэми я IэдакъэщIэкIхэр музей нэхъыфIхэмрэ цIыху щхьэхуэхэм я коллекцэхэмрэ зэрыщахъумэр.
- «Гравюрэ 1100-рэ» фIэщыгъэр дахэ къудейкъым, апхуэдиз лэжьыгъэ сурэтыщIым ди республикэм тыгъэ хуищIащ, -жиIащ Къумалым.
Пащты Герман къызэхуэсахэм ягу къигъэкIыжащ мы гъэлъэгъуэныгъэр СурэтыщIым и дунейпсо махуэм къызэрызэIуахар. А махуэм къалъхуащ сурэтыщI цIэрыIуэ Пикассо Пабло.
- Сэри си гъэсэнхэри дрогушхуэ ди IэдакъэщIэкIхэр КъБР-м утыку къызэрыщитхьамкIэ. Мы лэжьыгъэхэр куэд зэрыхъум къыхэкIыу, музейм щIэбгъэзэгъэну тыншу щытакъым. КъБР-м и Правительствэм, КъБР-м ЩэнхабзэмкIэ и министерствэм ар къызыхуэтыншэу къызэрызэрагъэпэщамкIэ фIыщIэ яхузощI. Сэ сыхьэзырщ мыпхуэдиз дыдэ сурэтхэмкIэ иджыри сыфхуэупсэну, - жиIащ Пащтым.
Щомахуэ Залинэ.