Абаданлагъа хурмет этиу, алагъа уллу кёллю болмау бизде къачан да энчи жерни алгъанды. Жыл санлары келген адамла жашауда кеслери къалгъан эселе уа, алагъа аслам эс бёлюнеди. Ол жаны бла районлада бла шахарлада энчи социал арала да ишлейдиле. Аллайладан бири Элбрус районда орналыпды. Ол социал болушлукъ тапдырыу жаны бла комплексли арады.
Бюгюнлюкде анда Уллайгъан адамланы кюнюне жораланып бардырылгъан жумушланы чеклеринде кёп иш тамамланады. Геуюрге кюн а аллай кезиулю тюбешиу ётгенди. Аппалагъа бла ынналагъа къонакъгъа Тырныаууз шахарны фахмулу сабийлерини къаууму келген эди. Ала абадан тёлюню аллында назмула айтхандыла, миллет тепсеуле кёргюзтгендиле.
Сабий эм жаш тёлю чыгъармачылыкъны айнытыуну Мокъаланы Магомет атлы арасы да сохталарын келтирген эди. Тюбешиуню уа Бапыналаны Альтаир Къулийланы Къайсынны назмусу бла ачханды. Фахмулу жашчыкъны жыйылгъанла къызыу къарсла бла ашыргъандыла. Ызы бла миллет тепсеулени «Къыз эшмеле» деген къаууму кесини хунерин кёргюзтгенди.
Къабартылы поэт Борис Кайгермазовну «Къонакъ» деген назмусун а Эскиланы Олеся орус тилде айтханды. Къызчыкъны ол тизгинлени жюреги бла жиберип эшитдиргенине уа абадан тёлю энчи ыспас этгенди.
Къулийланы Къайсынны назмуларын жаш тёлю бек сюйгенине биз кюн сайын шагъат болабыз. Джаббарланы Месум да бу кюннге деп закий поэтибизни «Сейирсине жашаргъа» деген чыгъармасын хазырлагъан эди. Аны ол тизгинлени чынтты артистча окъугъанына кёпле сейир да этип, ыразылыкъларын билдирген эдиле.
Барыбызны да сабийликден эсибиздеди ынналаны хуржунларында къачан да татлы саугъалары болуучусу эм ала андан юлюш чыгъармай къоймаучулары. Ма бу жол да ала келген къонакъланы хар бирине аламат татлы саугъала берген эдиле. Сабийле алагъа:«Сау болугъуз!» деп ыразылыкъларын билдирип, энтта жууукъ кезиуде жангы чыгъармала хазырлап къайтыргъа айтхандыла.
Таппасханланы Аминат.
Сурат авторнуду.