Къабарты-Малкъар гуманитар-техника колледжде «Профессионалитет» федерал проектни чеклеринде Ачыкъ эшиклени кюню болгъанды. Бу жумушха окъуучула, башха колледжлени студентлери, аланы аталары бла аналары, тюзюнлей къараргъа сюйген адамла да къатышхандыла. Программагъа жолоучулукъла, иш бла жалчытхан организацияланы келечилери бла тюбешиу да киргендиле. 
Ол кюн анда кёп магъаналы мастер-классла болгъандыла. Аланы санында «Призвание» медицина колледжни студентлери  саулукъгъа жараулу кёп магъаналы амал кёргюзтгендиле. Жолда  къыйналгъаннга  къаллай болушлукъ этерге боллугъун, жюреги тохтамазча солууну къалай алдырыргъа, сабий къарылса не мадар этерге кереклисин манекенлени юслеринде кёргюзтгендиле. 
Дагъыда минчакъла бла эшиуню, гитче класслада окъутууну  юслеринден мастер-классла бардырылгъандыла. Аны бла чекленмей, школгъа дери билим бериу планетарийни ишин кёрюрге, юзмезде суратла этиу эм робототехника бла шагъырейленирге онг болгъанды.  
- Бу жумуш бюгюн битеу Россейде бардырылады. Къыралда орта профессионал билим берген учрежденияла юч мингден аслам боладыла, бу федерал эришиуню ахырына жюз отузу ётгендиле. КъМР-де ол проектде хорлагъан а бизни колледж болгъанды, бу жумуш мында бардырылгъаны  да аны бла байламлыды. Бюгюн мында орта профессионал билим берген махкемелени студентлери асламдыла. Аланы хар бири да кесини майданында окъууларында къаллай сейир затлагъа юйреннгенлерин айтадыла. Ол а келген ата-аналагъа  мындан ары сабийлерине къыйналмай керекли окъууну сайларгъа иги амалды,- дегенди колледжни директору Барасби Абазов.
Огъарыда сагъынылгъаныча, ол кюн, студентледен сора да, школчуланы ишлери бла танышдыргъандыла. Аланы санында Нальчикни тёртюнчю номерли гимназиясыны сохталары болгъандыла. Ол мектепде 2021 жылдан бери «Шёндюгюлю школ» деген программаны чеклеринде «Кванториум» сабий технопарк ишин бардырады.
Анда ишлеген устаз Оксана Керефова  сабийлеге биринчи классдан башлап окъургъа амал болгъанын айтханды. Инсан къайсы вузгъа барыргъа сюйгенине да эс бёледиле, къыйналмай окъуугъа кирирге да болушадыла. Дагъыда окъуучуну къаллай илмугъа итиниую болгъанына уллу эс бурадыла эм ол жаны бла амалла къурайдыла. Гитчеле кёп тюрлю эришиулеге къатышып, кеслерин сынаргъа амаллары болгъанын да айтады. Алгъаракълада сегизинчи классны окъуучусу Рустам Гусулаев «Умный город» деген проекти бла битеуроссей конкурсда алчы болгъанды. Ишин жаратып, аны Къырал Думагъа чакъырып, алгъышлагъандыла. 
Фахмулу жашчыкъ колледжде да келгенлени проекти бла шагъырейлендиргенди. Робототехника илмуну хайыры бла саулай шахарыны макетин да этгенди. Анда троллейбус айланады, жел тирменни хайыры бла чыракъ жанады, саулукъгъа заран келтирмеген машинала жюрюйдюле. Ол «шахарда» хар зат да адамны саулугъуна, табийгъатха заран келтирмезча ишленипди. Троллейбус а телефонда программаны себеплиги бла керекли маршрутда айланады. 
Дагъыда хунерли сабийле кюн батарейлени болушлукълукълары бла адамлагъа харкюнлюк жашауда жараулу къаллай затла этгенлерин кёргюзтгендиле. «Адамны саулугъуна керекли кюбюрчек» да болгъанды, аны хайыры бла врачлагъа бармагъанлай, инсанны кеси аллына саулугъуна къараргъа, тюрлениулени эслерге онгу барды. 
Дагъыда къурулушда хайыр келтирген, уллу отну ёчюлтген, ауур затланы кётюралгъан машиналаны проектлерин да къоруулагъандыла. Тогъузунчу классны окъуучулары Огъурлуланы Милананы бла Ульяна Чавдарьны проектлерин да энчи белгилерчады. Ала аппарат бла эм компьютерде программа бла къайсы ашарыкъ къаллай хайыр неда заран келтиргенин ачыкълагъандыла, татлы суулагъа, чипсылеге  алданмагъанлай, таза суу ичерге чакъыргъандыла. 
Андан сора колледжни директору Барасби Абазов бла КъМР-ни жарыкъландырыу эм илму министрини орунбарасы Мокъаланы Ачемез, ата -анала бла тюбешип, проектлени юслеринден сёлешгендиле, аланы сорууларына да жууапла бергендиле. 
Темуккуланы Амина.
Сурат авторнуду.