Илъэс 13 - 14-хэм ит ПIытIэ и шыпхъу цIыкIур щIыгъуу щIымахуэ уаем Мэлгъэбэг къикIыжырт. Къаншыуей щыщт ахэр. ДжэдыкIэ тIощI ящарэ, къыщIаха сом тIэкIум щыгуфIыкIыу, пIащIэу унэм кIуэжырт зэдэлъхузэшыпхъур. Зауэ нэужь лъэхъэнэт, зэманыр гугъут, езыхэри хуэныкъуэт а джэдыкIэм, ауэ гуныкъуэгъуэ гуэрым ирихулIэри, сабиитIыр гъуэгуанэ кIыхь трамыгъэувэу хъуакъым нэхъыжьхэм. Ари сыт хуэдэ гъуэгуанэт! Тэрч тхыцIэ жыхуаIэу, дыгъужьыкъуэм дэкIын хуейт, бэзэрым укIуэн-укъикIыжын щхьэкIэ. ЖыпIэнуракъэ, зэи зэрамылъэгъуауэ, а щIыпIэм дыгъужьыр куэд къыщызэрыгъэхъуати, уз зэрыцIалэу зызыубгъуам хуэдэт.
ЗэрыгурыIуэгъуэщи, а щIыпIэхэм автобус щызекIуэтэкъыми, сабийхэр лъэст. ПщыхьэщхьэхуегъэзэкI хъуат, цIыкIухэр емыпIэщIэкIмэ, кIыфI къатехъуэнурэ, гъуэщэнут. ПIытIэ и шыпхъу цIыкIур Iэжьэм иригъэтIысхьэри, щIигъэхуэбжьащ. Iэгъуэблагъэр уэсым щIигъэнати, псэ Iуту зы цIыхуи щыплъагъуртэкъым. Абы нэхъри уигъэгузавэрт.
Арыххэу, пабжьэм зы щхъуэжь къыхэлъэтри, хъыджэбз цIыкIум жьэхэлъащ. ПIытIэ абы зридзащ, си шыпхъур ешх жиIэри… Дэнэ кърихами, дауэ къыIэрыхьами хэт ищIэрэ, ауэ ПIытIэ мэл къупщхьэшхуэ дыгъужьым и къурмакъейм ирихухри, итхьэлащ. Щхъуэжьым и псэр хэкIыху зиукIыжурэ къедзэкъа хъунти, ПIытIэ и Iэр зэрыщыту дзэкъапIэт, и джэдыгур зэхэчэтхъат. Арами, лIы хьэл зыгъэлъэгъуа ныбжьыщIэм и шыпхъу цIыкIур къыIэщIихат хьэщхьэрыIуэм.
СыщыцIыкIум щыгъуэ мы хъыбарыр щIэх-щIэхыурэ жаIэжу срихьэлIэрти, сымыужэгъужу сыщIэдэIурт. А щIалэ цIыкIум и пIэ сыкъихутауэ, дыгъужьым езэуар сэрауэ къызыщызгъэхъурт. Зоолог сыхъуауэ, къуэрылъхухэр сиIэжрэ, си ныбжьи хэкIуэтауэ, ПIытIэ и къуажэгъухэм яIуэтэжу иджыблагъэ зэхэсхат а хъыбарыр иджыри зэ…
АтIэ, щIалэр балигъыпIэ иувэщ, унагъуэ зэригъэпэщри, быниплIи игъуэтыжат. Зэрыхабзэщи, я адэм и хъыбар зыщIэхэм а цIыкIухэм дыгъужь шыркIэ еджэурэ, ахэри балигъыпIэ иувэжащ, мы тхыгъэр къапэщIэхуэмэ, ипэжыпIэ дыдэри къаIуэтэжынкIэ мэхъу.
Сэ а щIымахуэ пщыхьэщхьэ жыжьэм згъэзэжу, щIэныгъэ и лъэныкъуэкIэ къэсIуэтэну сыхуейт дыгъужьыр сабийхэм теуэн хуей щIэхъуам и щхьэусыгъуэр. Щхъуэжьхэр нэхъыбэм зэбгъэрыкIуэр сабийхэмрэ бзылъхугъэхэмрэщ. ЦIыхубзыр лIы щыгъынкIэ хуэпами, щыуэркъым ахэр! Дызытепсэлъыхь лъэхъэнэм къэхъуауэ щыта мы Iуэхугъуэри абы щыхьэт тохъуэ. А зэманым бзылъхугъэхэм цIыхубз бостейкIэ фIэкIа замыхуапэми, Тэрч тхыцIэмкIэ тетурэ ХьэмидейкIэ иунэтIат цIыхухъу щыгъынкIэ хуэпа фыз гуэрым. КъызэрыгуэкI цIыхухъу фащэ мыхъуу, джэдыгу щыгъыжт, и бгым къамэ зэщIэлъа ищIауэ. Арами, дыгъужьым мэкIэ къищIэщ ар зэрыбзылъхугъэри, ебгъэрыкIуат. Ауэ абы лIыхъугу кIуэцIылъу къыщIэкIри, щхъуэжьыр хигъэщIащ.
Абы лъандэрэ куэдым зихъуэжащ, ауэ дыгъужьыр аргуэру зэрыбэгъуам къыхэкIыу, цIыхухэм ебгъэрыкIуэн щIадзэжынкIэ сошынэ. Ауэ иджы, зэрыжаIэмкIэ, цIыхухъухэми зрадз!
Кинорежиссёр Михалков Никитэ къиIуэтэжу зэхэсха мы хъыбарми гу лъывэзгъэтэнут… ВертолёткIэ щакIуэ кIуат ар, зэщакIуэри щхъуэжьырт. Губгъуэм ираубыда щхъуэжьыр здэкIуари здэжари ямыщIэу бзэхат. Зыкъомрэ а щIыпIэр къалъэтыхьа нэужь, кIэбдз лъакъуитIым тету, телеграф пкъом кIэрыупсеяуэ кIэрыту гу лъатащ. КъызэрыщIэкIымкIэ, цIыхум зригъэщхьмэ гу къылъамытэн къыщыхъуу, зэфIэувауэ арат щхъуэжьыр!
ХХ лIэщIыгъуэм цIыхумрэ щIыуэпсымрэ я зэхущытыкIэм зихъуэжри, мэз псэущхьэхэмрэ дэрэ аргуэру дызрихьэлIэжащ. ЦIыхум къыгурыIуащ щIыуэпсым къудамэ лей къызэрыкъуэмыжыр, дыгъужьыр зэманым нэхъ Iущыж ищIащи, къызэрыддекIуэкIынури зэрыува щытыкIэм зэрыхэпсэукIынури къыгурыIуагъэххэщ. Абы кърикIуэну псори хэт ищIэрэ?!
Хьэтыхъу Iэубэчыр.