Налшык къалэм и коммунальнэ IуэхущIапIэхэмрэ «Экологистика» щIыналъэ операторым и лэжьакIуэхэмрэ иджыпсту бэлэрыгъыпIэ ямыIэу къалащхьэм и къабзагъэм толажьэ. Хуабэр зэрехам щхьэкIи къэмынэу, абыхэм я нэIэ трагъэтын хуей мэхъу пхъэнкIий идзыпIэхэми абыхэм я Iэгъуэблагъэхэми. Иужьрей зэманым апхуэдэ щIыпIэхэм щызэхуахьэс ерыскъыхэкIхэм плъагъуу къахэхъуащ, абы кърешалIэ псори дэнэкIи щизыкъухь хьэ, джэду хьэулейхэр, къуаргъхэр, тхьэрыкъуэхэр.
«Экологистика»-м и лэжьыгъэм къыхэзыгъахъуэхэм ящыщщ контейнерхэм яхъуреягъкIэ кърагъэувэкI шхын щыкъуейхэр, цIыхухэм уасэ щIату драгъэшын хуей кIэрыхубжьэрыхухэр. ЛэжьакIуэхэм, ятемылъ къалэнри ягъэзащIэу, ахэр къызэщIащыпэжын хуей мэхъу, апщIондэху къапэплъэ лэжьыгъэр мэгувэ.
ПхъэкIэбжьэкIэм къыщыщIэдзауэ жьы хъуа унэлъащIэхэмкIэ иухыжу зэтралъхьа самэр дэгъэкъэбзыкIыным хьэлъэзешэ машинэрэ бульдозеркIэ сыхьэтитI-щыкIэ елэжьу, щIыпIэр тралъэщIэжын хуейщ. Къэтхьынщ нэгъуэщI зы щапхъи - еджапIэхэм ящыщ зым и пщIантIэр зыпхъэнкIым пхъэнкIийр ихьурэ иредзэ абдеж пэмыжыжьэу щыт IуэхущIапIэм и контейнерым. Ахэр зэгъэщIылIар зыкъым, абы къыхэкIыу етIуанэм къытемыхуэ лэжьыгъэр ихьащ, гу лъатэу Iуэхур ягъэзэкIуэжыху. Мыбдежым мыри къэлъытапхъэщ - IуэхущIапIэхэм яхэтщ зи пхъэнкIиймрэ кIэрыхубжьэрыхухэмрэ езыхэм я къарукIэ дезыгъэшхэр. Абыхэм и контейнерхэр мыдрейхэм къыщIагъэсэбэпын щыIэкъым. Арыншами, пщIантIэ къэс езыхэм яй яIэжщ, - мэтхьэусыхэ лэжьакIуэхэр. ИтIани, языныкъуэхэр хабзэм йобакъуэ, я щхьэм фIэкIа нэгъуэщI зыми емыгупсысу.
Иджыри зэ фигу къэдгъэкIыжынщи, Къэбэрдей - Балъкъэрым хуэдэу пхъэнкIий дэшыпщIэр щымащIэ къэгъуэтыгъуейщ. Апхуэдэхэм я зэранкIэ къонэ и чэзум къащэхун хуей техникэмрэ зэрыIэбэ Iэмэпсымэхэмрэ. Иджыпсту къалэм и щIыпIэ псори къызэгъэпэщащ шэрхъ зыщIэт е щIыщIагъ контейнерыщIэхэмкIэ. Ахэр тыншу яунэщI хъуащ пхъэнкIийр дэзышхэм я къару леи темыкIуадэу, щIыпIэ псоми нэхъ псынщIэу нэсын хуэдэу зэман нэхъыби къахудэхуэу.
Мы махуэхэм «Экологистика» IуэхущIапIэмрэ коммунальнэ хозяйствэмрэ я лэжьакIуэхэм парк, лъэс зекIуапIэхэм щызэщIакъуэ къалэ кIуэцIым щынэхъыбэ бзиихухэмрэ шыкIуртIымейхэмрэ къапыхуа пщIащэхэмрэ къудамэ гъуахэмрэ. Ахэр къызэгъэпэщащ Iуэхур къатезыгъэпсынщIэ Iэмэпсымэхэмрэ техникэхэмкIэ.
Шэрэдж Дисэ.