|
Урысей Ипщэм щыяпэу
24 октября, 2023 - 08:29
Хъыбар зэрывэдгъэщIащи, УФ-м узыншагъэр хъумэнымкIэ и министр Мурашкэ Михаил ди республикэм щыIащ лэжьыгъэ IуэхукIэ. Абы щIыгъуу ди щIыналъэм и хьэщIащ УФ-м Узыншагъэр хъумэнымкIэ штатым хэмыт и IэщIагъэлI нэхъыщхьэхэм ящыщхэр.
Министрымрэ хьэщIэхэмрэ КъБР-м и Iэтащхьэ КIуэкIуэ Казбек я гъусэу щыIащ республикэм и Перинатальнэ центрым. Абы зэуэ цIыху 200-м я узыншагъэм щыкIэлъоплъ. Центрым и поликлиникэ къудамэм махуэм щIэлъыфынущ цIыху 12. Нэхъыщхьэращи, цIыхубзхэмрэ сабийхэмрэ я узыншагъэм зэрыкIэлъыплъын, хуей хъумэ, операцэхэр зэращIын Iэмэпсымэхэм я нэхъыфIхэр мыбы щыIэщ. Ипщэ Кавказ Ищхъэрэ федеральнэ щIыналъэхэм щыяпэу Перинатальнэ центрым къыхуагъэфэщащ «Качество и безопасность медицинской деятельности» сертификатыр, УФ-м Узыншагъэр хъумэным кIэлъыплъынымкIэ и Федеральнэ къулыкъущIапIэм фIагъымкIэ и Лъэпкъ институтым къыбгъэдэкIыу. 2019 гъэм щыщIэдзауэ IуэхущIапIэм иджырей лэжьэкIэм и мардэхэр къыщагъэсэбэп, сабий къалъхуагъащIэхэм япкърыт узыфэхэр къэхутэнри хыхьэу. КъинэмыщIауэ, ехъулIэныгъэхэр яIэу щыкIэлъоплъ, зыщрагъэужьыф зи хьэлъагъыр - килограмм мыхъуу къалъхуа сабийхэм. Ар Урысей псом щыIэ ехъулIэныгъэхэм ящыщу къалъытэ.
Мурашкэ Михаил щыIащ Республикэ сабий сымаджэщми. Метр зэбгъузэнатIэ мин 13 хъу IуэхущIапIэр зэгъэпэщыжынымрэ абы и Iэгъуэблагъэр зыхуей хуэгъэзэнымрэ и кIэм нагъэс. КИФЩI-р къапщтэмэ, фIагъ лъагэ зиIэ медицинэ дэIэпыкъуныгъэхэр сабийхэм щыхуащIэ IуэхущIапIэ ин хъунущ мыр. Сабий сымаджэщым иIэщ узыншагъэр щрагъэфIакIуэ, эндокринологие, нефрологие, генетикэ, нэ, нэгъуэщI узыфэхэмкIэ къудамэхэр, микробиологие лабораторэ. Абы и хирургие къудамэр иджы зыхуеину псомкIи къызэрагъэпэщащ. КъищынэмыщIауэ, медицинэ факультетым педиатриемкIэ и къудамэм и студентхэр абы щрагъэджэн, Iуэхум щыхагъэгъуэзэн папщIэ зыхуеинухэмкIи къызэрагъэпэщыну я мурадщ.
Министрыр журналистхэм щаIущIам и псалъэм къыхигъэщащ узыншагъэр хъумэным ди республикэм псынщIэу зэрызыщрагъэужьыр.
- IуэхущIапIэхэр зыхуей IэмэпсымэхэмкIэ къызэрызэрагъэпэщым и закъуэкъым зи гугъу сщIыр, атIэ цIыхухэм я узыншагъэр нэхъ псынщIэу зэрызэфIагъэувэж медицинэ IэмалыщIэхэр, хущхъуэгъуэщIэхэр къызэрагъэсэбэпырщ. Япэ медицинэ дэIэпыкъуныгъэр зэрырагъэфIакIуэм къыдэкIуэу, узыншагъэр хъумэным къуажэхэми гулъытэ ин щыхуащI, - жиIащ Мурашкэ Михаил.
Министрым жиIащ сабийхэм къыдалъхуа узыфэхэр къэхутэным теухуа лэжьыгъэр зэрагъэзащIэми арэзы зэрищIыр. Программэр зэрырагъажьэрэ сабий 411-м апхуэдэ узыфэ яIэу къахутащ икIи абы и фIыгъэкIэ Iэмал яIэщ абыхэм и чэзум фIэмыкIыу еIэзэну. УФ-м и Президентым и унафэкIэ, федеральнэ бюджетым къыхэкI мылъкумкIэ щIыналъэхэм щрагъэфIакIуэ узыншагъэм теухуа медицинэ хуэIухуэщIэхэр, сымаджэхэр зыхуей хущхъуэхэмкIэ къызэрагъэпэщ. ЩIыналъэм иужьрей зэманым гулъытэ лей щыхуащI фошыгъу узыфэ зиIэхэм я узыншагъэр егъэфIэкIуэным. КъищынэмыщIауэ, щIыпIэм анэмрэ сабиймрэ щагъуэт гулъытэм хохъуэ.
Мурашкэ Михаилрэ КIуэкIуэ Казбекрэ республикэм и районхэм я медицинэ IуэхущIапIэхэм тыгъэ хуащIащ дэIэпыкъуэгъу псынщIэ машинэ 12-м я IункIыбзэIуххэр, абы ехьэлIауэ къэралым щагъэзащIэ программэм хыхьэу. Министрым зэрыжиIамкIэ, щIыналъэхэм я медицинэ IуэхущIапIэхэм мы гъэм автомашинэ 2 204-рэ Iэрагъэхьащ.
- Транспортхэм я бжыгъэм, гъуэгум къыщыхъу гузэвэгъуэхэм щыхэхъуэ зэманым медицинэ IуэхущIапIэр хуэхьэзыру щытын хуейщ сыт и лъэныкъуэкIи дэIэпыкъуэгъу зэрыхъуным, - жиIащ Мурашкэ Михаил. – КатастрофэхэмкIэ федеральнэ медицинэ центрым фэбжьхэм теухуа хъыбар псори зэрекIуалIэм и фIыгъэкIэ, щIыналъэхэм я зэфIэкIым хохъуэ. Телемедицинэ чэнджэщхэри сэбэп мэхъу сымаджэ хьэлъэхэм я гъащIэр яхъумэнымкIэ.
- Машинэхэр фIы дыдэхэщ! Мурашкэ Михаил фIыщIэ хуэфащэщ лъэпкъ проектхэм, программэ щхьэхуэхэм хыхьэу ди щIыналъэм къыхуищIэм папщIэ, абыхэм язщ, онкологие центрым и ухуэныгъэр егъэжьэжыным ехьэлIа ди жэрдэмыр къызэрыддиIыгъари, - жиIащ КIуэкIуэ Казбек.
ТЕКIУЖЬ Заретэ.
|
15.05.2024 - 09:32 Музыкэ театрым накъыгъэм и 7-м концерт гукъинэж щитащ Урысей Федерацэм, Къэбэрдей-Балъкъэр, Къэрэшей-Шэрджэс республикэхэм щIыхь зиIэ я артист, оперэ уэрэджыIакIуэ цIэрыIуэ, Музыкэ театрым и солист |
|
15.05.2024 - 09:31 Бахъсэн щIыналъэм хиубыдэ къуажэхэм фэеплъ пэкIухэр, зэIущIэхэр, зэхуэсхэр щрагъэкIуэкIащ Хэку зауэшхуэм ТекIуэныгъэр къызэрыщытхьрэ илъэс 79-рэ щрикъум ирихьэлIэу. |
|
15.05.2024 - 09:29 1941 - 1945 гъэхэм екIуэкIа Хэку зауэшхуэм ди къэралым ТекIуэныгъэ Иныр къызэрыщихьрэ илъэс 79-рэ зэрырикъур дэнэкIи Iэтауэ щагъэлъэпIащ. |
|
15.05.2024 - 09:27 Прохладнэ районым и полицейхэмрэ жылагъуэ лэжьакIуэхэмрэ Прохладнэ къалэм щыпсэу, Хэку зауэшхуэм и ветеранхэу Ерохинэ Аннэ, Шайн Владимир, Головин Владимир сымэ я деж щыIащ икIи ТекIуэныгъэм и маху |
|
15.05.2024 - 09:25 Хэку зауэшхуэр зымылъэгъуа щIэблэр абы теухуа уэрэдхэм, усэ-хэм дыщедаIуэкIэ, фильм дыщеплъыжкIэ, дэтхэнэми и щIыфэр егъэтхытх, гущIэгъуншагъэрэ залымыгъэу зэрахьамрэ зыхэтщIэу. |
|