Къабарты-Малкъар Республиканы Башчысы Казбек Коковну бла республикагъа иш бла келген Россей Федерацияны маданият министри Ольга Любимованы эки жанлы тюбешиулери болгъанды. Ала регионда маданиятны айныу онгларын эмда «Маданият» миллет проектни бардырылыуун сюзгендиле.
Казбек Коков Россейни Президенти Владимир Путин башламчысы болгъан «Маданият» миллет проектни хайырындан маданиятны махкемелерини материал-техника мурдорларын кючлерге онг болгъанын, коллективлени чыгъармачылыкъ ишлери тириленнгенин чертгенди. Быйыл Нальчикде Маданият айныууну жангы арасы жашаугъа кийирилгенди, Озрекде, Терекскоеде, Приближноеде эмда Исламейде культура къалаланы, Нальчикде Сабий художестволу школну эм Искусстволаны Жабаги Казаноко атлы 2-чи номерли сабий школуну тынгылы ремонтлары, район китапханаланы бла музейлени жангыдан толтуруу белгиленипди. Бир жыл мындан алгъа Жаш къараучуну театрына тынгылы ремонт этилгенди, Дыгулыбгейде, Ташлы-Талада, Камлюковода, Александровскаяда маданият къалалагъа, Урванда маданият арагъа, Нальчикде бла Анзорейде искусстволаны сабий школларына да.
Битеу да бирге арт беш жылгъа республикада 27 маданият юйню ишлегендиле эм жангыртхандыла, 8 модель китапхана къурагъандыла, 17 искусстволаны сабий школуна ремонт этгендиле эмда аланы жалчытхандыла, Жаш къараучуну театрын, Гинжи театрны да, муниципалитетле уа 8 автоклуб алгъандыла.
«Мында жашагъанла бош заманларын оздурурча эмда ала чыгъармачылыкъ жаны бла юйренирча битеу бу жангы онгла Къабарты-Малкъарны таматалары бла биригип ишлегенибизни эсебидиле. Республиканы уллу маданият къолайлыгъы барды, асламланы регионну бай хазнасы бла шагъырейлендиргенлей турлукъбуз», – дегенди Ольга Любимова.
«Бюгюнлюкде эл тийрелеге бла гитче шахарлагъа биз энчи эс бурабыз. Маданият юйлени жангыртыу программа жетишимли бардырылады, келгенле кёп болгъандыла, ала маданият программалагъа къатышханларындан сора да, жыйылыуланы къураргъа ДК-ланы ишчилерине болушадыла», – деп белгилегенди ол.
Бёлюмде уруннганланы айлыкъларына бла алагъа билеклик этиу соруулагъа да энчи къаралгъанды. Республиканы Башчысы министрге бюджет ишчилени, ол санда маданиятда ишлегенлени хакълары арт юч жылда регионда жыл сайын 10 процентге кёбейгенин билдиргенди. Былтыргъы жылны ахырында быйылны аллында маданиятда бла искусствода ишлегенлени грантлары бла стипендиялары эки кереге ёсгендиле, андан сора да, исполнительское искусство жаны бла чыгъармачылыкъ проектлеге себеплик этилирча къошакъ грантла къуралгъандыла.
Республиканы оноучусу Ольга Любимовагъа Къабарты-Малкъаргъа келгени эмда маданият къыйматланы жарашдырыугъа бла сакълаугъа эс бёлгени ючюн ыразылыгъын билдиргенди. Ол кюн окъуна федерал Маданият министерствону таматасы Нартанда маданият юйде, А. Шогенцуков атлы Къабарты къырал драма театрда, Къулийланы Къайсын атлы Малкъар къырал драма театрда, ишлене тургъан Театрланы къаласында (Жаш тёлюню чыгъармачылыкъ къаласында), дагъыда Искусстволаны Шимал-Кавказ къырал институтунда болгъанды.
