КъМР-ни Парламентини таматасы Татьяна Егорованы башчылыгъында президиумну жыйылыуу болгъанды. Депутатла законла чыгъарыучу органны кезиулю пленар кенгешин 31 октябрьде бардырыргъа келишгендиле.
Президиум республикалы законланы проектлерин сюзгенди. Ол санда «КъМР-де къырал саугъаланы юсюнден» республикалы законну 11-чи эм 16-чы статьяларына тюзетиуле кийирилгендиле. Аны республиканы Правительствосу хазырлагъанды. Тюзетиулеге тийишлиликде, КъМР-ни къырал саугъаларыны тизмесине «КъМР-ни информация технологияла сферасыны бла связьны сыйлы къуллукъчусу» деген сыйлы ат кийирилгенди.
– Профильли министерство белгилегенича, быллай саугъа сфераны айнытыугъа себеплик этерикди, ол санда информация технологияла жаны бла усталаны кёбейтирикди, аланы профессионал билимлерин ёсдюрюрге кёллендирликди, – дегенди Законодательство эм жер-жерли самоуправленияны соруулары жаны бла комитетни таматасы Борис Мальбахов.
«КъМР-де тёгерекдеги къудуретни сакълауну юсюнден» республикалы законну 3-чю статьясына тюрлениулеге да къаралгъанды. Аграр соруула, табийгъатны хайырланыу, экология эм тёгерекдеги къудуретни къоруулау жаны бла комитетни башчысыны орунбасары Сафарбий Шхагапсоев ангылатханыча, 3-чю статьяны 2-чи кесегине жангы бёлюмле къошуладыла. Алай бла 13-1 пунктда былай жазыллыкъды: «хауагъа кёп заманны жыйылгъан хатаны салгъан объектлени ачыкълау», 13-2 бёлюмде уа: «хауагъа кёп заманны жыйылгъан хатаны кетериуню къурау».
«Бир-бир республикалы законлагъа тюзетиуле кийириуню юсюнден» законну проектин сюзюу башланнганды. Ол 2023 жылда 24 июльда чыгъарылгъан «Къырал социал болушлукъну юсюнден» Федерал законнга тюзетиулени кийириуню юсюнден эмда «Юйюрню файдаларын бла аны хар келечисине жетген орталыкъ ёлчемни тергеуню эм кеси аллына жашагъан инсанны къолайлыгъын тергеуню, анга кёре аланы къолайсызлыкъларын тохташдырып, къырал себеплик этиуню юсюнден» федерал законнга тюрлениуле кийириуню юсюнден» федерал законнга келишдириледи.
– Федерал законда къолайсыз юйюрлени хар келечисине бла кеслери алларына жашагъан инсанлагъа жетген файданы орталыкъ ёлчеми «РФ-де жашау этерге жетерик ахчаны эм аз ёлчемини юсюнден» федерал законнга кёре тохташдырылады. Бу тюзетиулени «Юйюрню, аналыкъны, аталыкъны эм сабийликни къоруулауну юсюнден», «КъМР-де сабийден ауругъан тиширыуланы, сабийлерине ёшюн салгъан аналаны эмда юч жылгъа дери сабийлени татымлы аш-суу бла жалчытыуну юсюнден», «Къолайсыз юйюрлеге бла кеслери аллына жашагъан инсанлагъа къырал себепликни юсюнден» республикалы законлагъа кийириледиле, –деп ангылатханды Урунуу, социал политика эм саулукъ сакълау комитетни башчысы Хусейн Кажаров.
Президиум «КъМР-де автомобиль жолланы бла жол къурулуш ишлени юсюнден» законопроектни, «Билим бериуню юсюнден» законну 5-чи статьясына тюзетиулени да сюзгенди. Ала федерал излемлеге келишдирилгендиле.
Законопроектле сейирлери болгъан министерстволаны бла ведомстволаны къарауларына берилгендиле.
Жыйылыуда федерал законланы бла субъектледе законла чыгъарыучу органланы башламчылыкъларын да сюзгендиле. Алада жер-жерли самоуправление органланы ишлерин къурауну болумларыны, сабийлери болгъан юйюрлеге къошакъ къырал болушлукъну юслеринден айтылады.
«Тюрлю-тюрлю соруула» бёлюмде Билим бериу, илму эм жаш тёлюню ишлери жаны бла комитетни башчысы Нина Емузова Парламентни президиумуну «КъМР-де жаш тёлю политиканы болумуну эм айнытыуну онгларыны юсюнден» темагъа жыйылыуунда чыгъарылгъан эсгертиуле къалай толтурулгъанларын айтханды.
Физкультура, спорт эм туризм жаны бла комитетни таматасы Арсен Барагунов «КъМР-де турист ишни юсюнден» темагъа «правительстволу сагъатда» чыгъарылгъан эсгертиулени толтурууну юсюнден билдиргенди.
Депутатла тюрлю-тюрлю сфералада ишлегенлени жетишимлери ючюн КъМР-ни Парламентини Сыйлы грамотасы бла саугъалауну юсюнден оноуну да чыгъаргъандыла.
КъМР-ни Парламентини
пресс-службасы.
