Огъары малкъарлы жаш Улбашланы Хасан башчылыкъ этген «Элитстрой» чекленнген жууаплылыгъы болгъан общество къуру бу  элде окъуна кёп къурулушну бардырады. Элге кирген жерде къаланы, алайда боллукъ эсгертмени къурулушу бошалса, ол тийреге къууат салыргъа ушап турады. Къазакъланы Жюнюс, Асанланы Хаджимурат, Кабард Карданов атлы орамлагъа асфальт салгъанла бу обществону къурулушчуларыдыла. 

Саутуда къырылгъанлагъа ишленнген межгитни арбазына гыйы ташланы тап салып, олтурурча шинтикле орнатып, ким да бюсюрерча этгенле да бу жашладыла. Черек ауузунда элледе 1942 жылда бир тюрлю хаталары болмай къырылгъанлагъа Туура Хаблада ишлене тургъан эсгертмеге алайтын ётген эс бёлмей къоярыкъ тюйюлдю. Анда алыкъа къурулуш ишле бошалмагъандыла. Сора Черек суу бла Мухолгъа ётген жерде жолну жангырта, жангы кёпюрню да къулакъларына бетон къуя турадыла. Эскиден эки метр бийикликде боллукъ кёпюрню эллиле ашыгъып сакълайдыла. Ол кёпюр келир жыл июньда хайырланыргъа берилликди, ишде чырмаула чыкъмасала.

Къурулуш участокну начальниги Акъболатланы Халик бла башында сагъынылгъан къурулушчула къыйын салгъан жерледе болуп чыкъдыкъ. Жашланы хуна къалауда (гыйы ташдан), плитка салыуда къол ызларына сукъланырчады. Тюз кеси юйлерине этгенча, бек ариу. Былай бир чурумларын да тапмадым. Алай кесими бир оюмуму Халикге айтмай болмадым. 

Мухол тёшге ёр жолну бек тап эте турадыла. Башындан жар оюлмазча, тюбюне да алай бетон хунала этгендиле. Энди ол Мухол сыртны тюзетип, алайгъа бир терекле орнатсала, бек ариу боллукъ эди. Башындан буруу этселе, тюбюнден мал кираллыкъ тюйюлдю. Ол кюнледе элни администрациясыны башчысы Чаналаны Муссагъа тюбеялмай кетдим, ансы бу муратымы анга да айтырыкъ эдим. 

Элде туя терекле ёсдюргенле кёп, быллай жумушда бахчаларындан терекледен эллиле да юлюш чыгъарыр эдиле. Бу амалны Акъболат улу да жаратды, алай ол затла проектге кирмегенин да чертди.

«Элитстройну» керекли техникасы барды. Бюгюнлюкде элде къурулушлары бара тургъан объектледе 20 адам ишлейди. Къурулушчула къуру Огъары Малкъарда ишлерин бардырмайдыла. Огъары Жемталадан Зарагижге дери асфальт жол салгъандыла. Нальчикде Зокаланы Валерий атлы 8-чи номерли мектепде ремонт этедиле. Сора шахарда бир ненча кёп къатлы юйге федерал программагъа кёре тынгылы ремонт этгендиле. 

Аны бла чекленип къалмай, Улбашланы Хасан бир эллилерине къурулуш материалла бла да болушады. 

Абу улу А.