КъМР-ни Башчысы Юрий Коков Россейни МЧС-ини бла регионланы араларында байламлыкъланы къурауну сорууларына аталгъан битеуроссей кенгешге къатышханды. Ол селектор халда бардырылгъанды.
 Москвада РФ-ни граждан оборонаны, къоркъуулу болумланы эм табийгъат къыйынлыкъла келтирген хатаны кетериу жаны бла министри Евгений Зиничевни таматалыгъында битеуроссей жыйылыу бардырылгъанды. Анда халкъны къоркъуусузлугъун сакълагъанда къутхарыучуланы бла регионланы араларында байламлыкъла къурауну мадарлары сюзюлгендиле.
Министр белгилегенича, къыралда табийгъат болумла терк-терк къайтарыладыла. От тюшюуледен бла суу басыуладан а къоранчла къалгъанладан кёпдюле. Сёз ючюн, былтыр Россейни тогъуз регионун (ол санда Къабарты-Малкъарны да) суу басып, агъачла кюйюп 42 минг адам ачыгъанды.
Къоркъуулу болумланы кетериу жаны бла хайырлы система къуралгъанды. Алай, Евгений Зиничев чертгенича, битеу кючню заранны кетериуден табийгъат къыйынлыкъланы болдурмаугъа бурургъа керекди. Финансланы «жер-жерледе кезиуден-кезиуге къайтарылгъан табийгъат болумланы тохтатыу жаны бла мадарлагъа къоратыргъа тийишлиди».
Министр РФ-ни Президентини буйругъу бла регионланы оноучулары Къоркъуулу болумла эм от тюшюуледен сакъланыу жаны бла комиссияланы башчыларыча  бу ишге таматалыкъ этерге кереклисин эсгертгенди. Бу буйрукъ толтурулгъан регионлада уа финансланы бла керекли ресурсланы жыйыугъа башчылыкъ этиу хайырлы болгъаны ачыкъланнганды.
Энчи  эс къутхарыучуланы  чакъыргъанда «112» бирикген телефон номерни сингдириуге эмда «Къоркъуусуз шахар» системаны жашауда бардырыугъа бурулгъанды.