Бу кюнледе Россейни художестволу академиясыны келечилери ишчи жумуш бла Къабарты-Малкъаргъа келип турадыла. Аланы жолоучулукълары «Шимал Кавказны шёндюгю художниклерини чыгъармаларында тиширыуну сыфаты» проектни чеклеринде къуралгъанды.
Академияны делегациясы КъМР-ни Парламентини депутатлары бла тюбешгендиле. Къонакъланы алгъышлай, спикер Татьяна Егорова ёсюп келген тёлюню чыгъармачылыкъ фахмусун айнытыугъа къыралда, регионда да уллу магъана берилгенин чертгенди. Ол РФ-ни Президентини «Россейли тёрели хазнаны сакълауну эм кючлеуню къырал политикасыны болумларын къабыл кёрюуню юсюнден» Указына тийишлиликде, къыралда халкъланы культураларын, энчиликлерин сакълау эм айнытыу стратегия магъаналы борчла болгъанларын чертгенди.
- Россейни художестволу академиясы Зураб Церетелини башчылыгъында тамамлагъан жумушла бютюнда сыйлыдыла, багъалыдыла. Академияны делегациясы Къабарты-Малкъаргъа келгенини жарыкъландырыу, билим бериу магъанасы уллуду,-дегенди Татьяна Борисовна.
Спикер быллай тюбешиуле культура байламлыкъланы кючлегенлерин, республикада художестволу билим бериуню айнытыугъа себеплик этгенлерин белгилегенди.
– Бизни чыгъармачылыкъгъа фахмулу тёлюлени юйретирге битеу онгларыбыз бардыла. Хамид Савкуевни, Руслан Цримовну, Герман Паштовну, Алим Пашт-Ханны, Мухадин Кишевни эм кёп башхаланы атлары къуру Россейде угъай, тыш къыраллада да кенг белгилидиле. Дагъыда Михаил Шемякин къабартылы болгъанына бек ёхтемленеди, сабий чыгъармачылыкъны «Кюн академиясында» уа аны атын жюрютген класс ачылгъанын белгилерчады,-дегенди Парламентни таматасы.
Республиканы законла чыгъарыучу органы культура бла байламлы соруулагъа энчи эс бургъанларын, депутатла академияны жарыкъландырыу, илму, билим бериу проектлерине къатышыргъа хазыр болгъанларын да чертгенди. Профильли комитет жыйылыуунда сабийлеге искусство жаны бла къошакъ билим бериуню айнытыуну сорууларына къарагъанын, кюз арты сессияны чеклеринде КъМР-ни Художниклерини союзу бла тюбешиу боллугъун да билдиргенди спикер. «Депутатла республиканы культура жашаууна тири къатышадыла»,-деп къошханды.
Ёсюп келген тёлюню къыралда белгили вузлада чыгъармачылыкъгъа юйренирге, фахмуларын айнытыргъа онглары болургъа кереклисин белгилеп, Татьяна Борисовна академияны келечилеринден бу соруулагъа эс бурургъа, себеплик этерге тилегенди. «Билим бериу учрежденияла бла келишимле къабыл кёрюрге боллукъ эди. Художестволу академия бизге бу соруулада себеплик этер деп ышанабыз», – дегенди Татьяна Борисовна.
Художествону россейли академиясыны вице-президенти Татьяна Кочемасова академияны башчысы Зураб Церетелини атындан парламентарийлеге культураны айнытыугъа эс бургъанлары ючюн ыразылыгъын айтханды. Ол Шимал Кавказда миллет культураны, чыгъармачылыкъны ышаннгылы мурдору салыннганын, регионну художниклерини атлары битеу дунияда да белгили болгъанларын чертгенди.
- Къабарты-Малкъарны бу жаны бла онглары бек уллудула. Ол а мында тюрлю-тюрлю проектлени бардырыргъа болушады,-дегенди эмда Нальчикге академияны делегациясы экинчи кере келгенин айтханды.
Докладчы келир жыл Россейни илмула академиясына эмда Россейни художестволу академиясына 300 жыл толгъанын да эсгертгенди эмда илму бла чыгъармачылыкъ бирге келгенлерин, аланы айнытыу битеу къыралны да алгъа барыуун жалчытханларын айтханды. «Бюгюнлюкде бизни баш борчубуз регионлада академиклерибизге не жаны бла да болушургъады. Къабарты-Малкъар бу жаны бла энчиди, мында чыгъармачылыкъны кесини школу къуралгъанды. Парламентге киргенде уа бизни академик, устаз Хамид Савкуевни ишлеген суратны кёргенибизде, бек къууаннганма»,-дегенди ол.
Жыйылыуда «Россейни художниклерини союзу» чыгъармачылыкъ биригиуню регионда бёлюмюню башчысы Жанна Канукова, РАХ-ны илму-излем институтуну бёлюмюню башчысы Татьяна Астраханцева, РФ-ни халкъ художниги, РАХ-ны регионла бла байламлыкъла жаны бла управлениясыны таматасы Константин Петров, РАХ-ны чыгъармачылыкъны теориясы эм тарыхы жаны бла илму-излем институтуну башчысы Сергей Ступин да сёлешгендиле.
Ала академия регионлада бардыргъан проектлени, ёсюп келген тёлюню юйретиуню, чыгъармачылыкъ жаны бла билим бериуню, жаш художниклени кёллендириуню юслеринден айтхандыла.
«Шимал Кавказны шёндюгю художниклерини чыгъармаларында тиширыуну сыфаты» проектни чеклеринде уа илму жыйылыула, билим бериу, жарыкъландырыу жумушла, кёрмючле, мастер-классла къураладыла. Дагъыда конкурс да бардырылгъанды. Быйыл анга 200-ге жууукъ чыгъарма берилгенин билдиргендиле тюбешиуде. Проект академияны «Шимал Кавказны художниклерини чыгъармаларында тёреле эм жангычылыкъла» культура магъаналы башламчылыкъны чеклеринде къуралгъанын белгилерчады.
Тикаланы Фатима.
