КъМР-ни Башчысы Казбек Коков Россей Федерацияны Президентинде Шимал-Кавказ федерал округну толу эркинликли келечисинде советни полпред Юрий Чайка бардыргъан жыйылыууна видео амал бла къатышханды.
Кенгешде округну жеринде туризмни айнытыуну 2025 жылгъа дери жарашдырылгъан стратегиясында 2021-2025 жыллагъа белгиленнген ишлени тамамлау не халда болгъанына къаралгъанды, жолда жюрюуню къоркъуусузлугъун жалчытыугъа да энчи эс бурулгъанды.
Сюзюуге РФ-ни экономиканы айнытыу министрини орунбасары Сергей Назаров, КАВКАЗ.РФ-ни баш директору Андрей Юмшанов, Ространснадзорну СКФО-да регионла аралы управлениясыны таматасы Дмитрий Кравцов, округну регионларыны оноучулары, право низамны сакълаучу органланы башчылары къатышхандыла.
Белгиленнгенича, туризм-рекреация жаны бла къыралда къуралгъан энчи экономика тийреледен 10-су Шимал Кавказдадыла. Аладан бири уа – Элбрусда. Мында тап жарашдырылгъан экология жолланы кюз арты башланнганлы 20 минг чакълы турист хайырланнганды, 100-ден артыкъ гид а 15 жыл чакълы сакъланнган аламат инфраструктура ючюн ыразылыкъларын билдиргендиле.
Республикагъа 2023-2024 жыллада Нальчикде, Прохладна, Зольск, Элбрус, Черек, Чегем, Урван районлада къонакъ юйлени къурулушларына, экология паркла къураугъа – битеу да 51 объектге - 756 миллион сом чакълы бёлюннгенди. Экология жолланы андан ары къураргъа, туристлени жангы къаууму келирча этерге керекди деп, аллай борч салыннганды.
Жылны узуну солургъа онг чыкъгъаны бла регионланы араларында жюрюген транспортну саны да ёсгенди. Аны себепли жоллада къоркъуусузлукъну жалчытыугъа энчи эс бурулады. Республикада ол жаны бла халны юсюнден КъМР-де ич ишлени министри Василий Павлов билдиргенди. Къабарты-Малкъарда федерал жолланы тап халгъа келтириу бла «Кавказ» управление кюрешеди. Ол жолла тохташдырылгъан мардалагъа келишир ючюн кёп иш этеди, ол санда аланы тёрт ызгъа дери кенгертеди, орталарын бегитеди. Аны хайырындан тёрт жылны ичинде аварияланы саны 2019 жылда 36 кереден 6 кереге, 2022 жылдан бери уа 5 кереге азайгъанды. Жолланы игилендириу иш тохтаусуз бардырылады, деп билдиргендиле КъМР-ни Башчысыны бла Правительствосуну пресс-службасындан.
