Быйыл бизни республикада эм азындан 160 километр чакълы жолла жангыртыллыкъдыла. Муниципал районланы барына да регионну Жол фондундан болмагъанча аллай бир ахча берилгенди субсидияла бла. Ол а неден къуралады?

Жол фонд деп бюджетден бёлюннген ахчаны бир кесегине айтадыла. Ол жаланда жоллада жумушлагъа къоратылыргъа жибериледи. Фондну бохчасы отлукъгъа акцизледен, транспорт налогдан, жоллада жюрюуде жорукълагъа этилген бузукълукъла ючюн тазирледен, ауур жюкле ташыгъан машиналадан жыйылгъан тёлеуледен къуралады. Ары дагъыда федерал бюджетден субсидияла къошадыла.

Бу ахчагъа жыл сайын Къабарты-Малкъарда жолла жангыртыладыла, алада къоркъуусузлукъну жалчытыу жаны бла мадарла этиледиле. Дагъыда чыракъла бла жарытадыла, буруула, белгиле, светофорла орнатыладыла, жаяу жюрюгенлеге жолчукъла жарашдырыладыла.

Эсге сала айтханда, бюгюнлюкде республикада борч этилип тёленмей тургъан транспорт налог тогъуз жюз миллион сомгъа жетгенди. Ол жыйылса эди, регионну жолларын бютюнда тап, тынгылы этерге къолдан келликди. Алай бла бу налогну магъанасы уллуду, аны заманында берирге кереклисин да унутургъа жарамайды.

Улбашланы Мурат хазырлагъанды.