Тукъум жыйылыуланы бардырыу тёре башланнганлы иги кесек болады. Ала  ёсюп келген тёлюге бютюн магъаналыдыла,  аламат жашау дерсдиле. Алагъа къатышханла бир бирлерин иги таныргъа онг тапхандан сора да, ата-бабаларыны, тукъумну тарыхындан кёп зат биледиле, жигер, фахмулу эмда жетишимли адамларын хурметлейдиле. Ол затланы бу кюнледе Акъ-Сууну   «Жюрек кёл» деген жеринде бардырылгъан Махийланы  жыйылыуларында да кёрдюк.

Къалын агъач бла къуршоуланнган жашил тала, бир жанында  кийик баппушла жюзюп айланнган, жюрекге ушагъан кёл - бу тийрени  бошдан сайламагъандыла бу тюбешиуню къурагъанла. Ол Махийланы  Музафарны  жериди.

Узун чатырланы ичлеринде  берекет столла тизгин салыннгандыла.  Омакъ кийиннген сабийле, абаданла да сукъланып къарайдыла тукъум тамгъаны бла  Минги тауну суратлары бла  байракъгъа.  Кюн да ала ючюн тийгенчады… Тёгерекде-башда ариулукъ жюрекге хошлукъ береди. Эр кишиле, малла союп, кими шишлик эте,  кими  къазан аса, къазауат этип кюрешедиле. Жашла, къызла да хант столланы артларында олтурадыла, арлакъда энчи чатырда  уа - тау адетдеча, огъурлу къартла - тукъум таматала. Ала бир бирлерин тансыкълайдыла, эртте заманланы эсге тюшюредиле.

Сабийлени да къууанчларыны чеги жокъду.  Спортну сюйгенлеге да онг барды усталыкъларын кёргюзтюрге. Бир жапманы тюбюнде уа Махийланы Хусей ишлеген затладан сейир кёрмюч да  жарашдырылгъанды. Ары келгенле  бёрюню, айыуну, башха жыртхыч жаныуарланы бла къанатлыланы  къолдан уста болгъан Хусей хазырлагъан гинжилерин кёредиле.   

Жыйылыу   ауушхан жууукълагъа бла  ахлулагъа дууа тутуудан  башланнганды. Ызы бла  тукъум тамата  - Махийланы Токаш - сёлешгенди.  Ол келгенлени алгъышлагъанды эмда бу огъурлу ишни къурагъанлагъа ыспас этгенди. Быллай жыйылыуланы  мындан ары да  бардырыргъа  кереклисин белгилегенди. «Быллай тюбешиуле бир бирни таныргъа, керек заманда бир бирге болушлукъгъа келирге,  билеклик этерге да   онг  бередиле»,- дегенди.

Къайсы тукъум да  кесини ахшы, огъурлу  адамлары бла ёхтемленеди. Махийланы араларында да белгили врачла, къурулушчула, устазла, педагогика,  алимле, аскер къуллукъчула да асламдыла. Бюгюнлюкде  энчи аскер операциягъа къатыша, жанларын, къанларын да аямай Россей Федерацияны  жалынчакъсызлыгъын  къоруулагъан жашла да кёпдюле.

Сёз ючюн, элде орамладан бирине аты аталгъан Беппону жашы Георгий. Уллу Ата журт урушха тири къатышханды, Ата журт урушну ордени,  кёп майдалла бла да саугъаланнганды. «Акъ-Суу» совхозда ишлегенди, урунууну ветераны эди. 

 Махийладан Зейтунну жашы Валера юридический илмуланы кандидатыды, Мухтарны жашы Ахмат Ингушетияны, Къабарты-Малкъарны да  сыйлы артистиди, «Балкария» ансамбльни солисти болуп тургъанды, бусагъатда анда къызлары Мариям бла Зухура тепсейдиле.  Хажи-Муссаны жашы Абдулла  Нальчикде  бийик вольтлу аппаратла чыгъаргъан заводну баш директоруду,  Хамангерийни къызы Людмила Нальчикде илму-излем институтну директоруну орунбасарыды, филология илмуланы кандидатыды.

Махийланы Заур кёп жылланы   ГИБДД-ни таматасыны орунбасары болуп ишлегенди, бусагъатда ГИПСЕЛ-де транспорт жаны бла инженерди, кеси да  бизни бла кёп жылланы ишлеген   Аминни жашыды.   Давлетгерийни жашы Руслан «Мир» телекомпанияны баш операторуду. Аны аягъы басмагъан республикада  бир эл,  шахар неда бир  белгили жер къалмагъанды. Ол тарых магъаналы  кёп документли фильмлени алгъанды.

Адильгерийни жашы Тахир «Долинск»,  ызы бла Ташлы-Талада «Кавказны танглары» туризм базалагъа  башчылыкъ этип тургъанды, аны къызы Азиза Нальчикде диализ араны  бёлюмюню таматасыды.  Магомедни къызы Римма  Акъ-Сууда амбулаторияны таматасыды, бийик категориялы врачды.  Республиканы Т.Мальбахов атлы  баш китапханасында кёп жылланы ишлеген  Тауланны къызы Азизаны да кёпле таныйдыла.

Бу тукъумда дагъыда  бет жарыкълы уруннган, хунерликлери, усталыкълары бла да ёхтемленирча жашла бла къызла дагъыда бардыла. Аланы араларында экономика департаментни баш специалисти  Шакъманны къызы Маринаны, кёплеге эс тапдыргъан предприниматель  Махийланы Юсюпню жашы Музафарны,  аны жашларын - спортну карате тюрлюсюнден республиканы, Юг Федерал округну да чемпионлары  Азаматны бла Амашны,  дагъыда Хажи-Муссаны жашы Абдулну, Ханафийни жашы Харунну эмда кёп башхаланы белгилеп айтыргъа боллукъду.

Ол кюн  юч жюзге жууукъ адам жыйылгъанды.  Бир бирни танымагъанла танышдыла, эрттеден бери кёрюшмегенле тансыкъларын алдыла, кёп алгъышла, насийхат сёзле да айтылдыла.  Жашла, къызла, гюрен туруп, тепседиле, ойнадыла, кюлдюле. Аны уа не багъасы барды!

Артда уа  барысы да бирге, башха-башха да суратха тюшдюле. Къартла,  жашла да бу ишни къурагъанлагъа дагъыда  жюрек ыразылыкъларын билдирдиле, ыспас этдиле. Быллай тюбешиулени мындан ары да  бардыра турургъа оноулашдыла. Ала жууукълукъну, шуёхлукъну, биригиулюкню да андан ары кючлендирирге себеплик этгенлерин чертдиле. Тукъум тизмеге  бир тюрлю сылтау бла тюшмей къалгъанланы атлары да жазылдыла. Ол кюн ол  тизме бютюн  узун болгъанды.

Абаданла юйлерине, малларына къараргъа ашыкъгъан эселе да, жаш адамланы, кетериклери келмей, дагъыда иги кесек заманны мычыдыла. Тёгерекде къудуретге сукъланып: «Биз бери дагъыда  бек сюйюп къайтырыкъ эдик»,-дей эдиле ала. Керти окъуна, «Жюрек кёлню» тийреси  жаннетге ушайды. Мында   къайгъыларынг чачыладыла, жарыкъ сагъышла, ахшы умутла акъылынгы бийлейдиле. Ол кюн ары келгенле хар бири да кесине  жубанч тапханды, таза хауа бла солуп, зауукълукъ алгъанды.

Белгили жырчыбыз Созайланы Нату бла къобузчу Османланы Назифa уа ары келгенлени ариу ауазлары, къобуз тартыулары бла къууандырдыла, кёллерин кётюрдюле. Махийлары Холамда адамлары  аз сёлешип, кёп ишлеген, кишиликлери бла да атларын айтдыргъан, адет-къылыкъны къаты тутхан, жюрютген «эр аякъ» деп айтдыргъан  Тотур деген жерден чыкъгъандыла, анга тийишли болуп да келедиле. 

Холаланы Марзият.