Къэбэрдей-Балъкъэрым Транспортымрэ гъуэгу хозяйствэмкIэ и министерствэм иджыблагъэ къызэритамкIэ, 2023 гъэм республикэм и щIыпIэ псоми хыхьэ жылэхэм километр 66-рэ хуэдиз зи кIыхьагъ, щIыналъэ мыхьэнэ зиIэ автомобиль гъуэгухэм я гъунэхэм иджырей уэздыгъэхэр щыфIадзэнущ.
Ахэр фIалъхьэнущ гъущI-бетоным къыхэщIыкIауэ гъуэгубгъухэм деж щыт пкъохэм. А лэжьыгъэхэр тэмэму зэфIыхьэн папщIэ яхуримыкъу трансформатор подстанцхэр, пкъохэр ягъэувынущ, светодиод уэздыгъэхэр, плафонхэр, ток кIапсэщIэхэр дыщIагъунущ.
Лэжьыгъэхэр езыгъэкIуэкIыну IуэхущIапIэм къэрал зэгурыIуэныгъэр иджыблагъэ иращIылIащ, мыгувэуи Iуэхум иужь ихьэнущ.
Къэбгъэлъагъуэмэ, къагъэнэхунухэм ящыщщ Аруан щIыналъэм и къалащхьэ Нарткъалэрэ Псынабэрэ я зэхуакум хуэзэ автомобиль гъуэгуу километри 3,3-рэ, Май куейм - Май къалэмрэ Октябрьскэ жылэмрэ зэпызыщIэ километри 3,1-р. Апхуэдэуи Прохладнэ щIыналъэм и Солдатскэ, Къэрэгъэш, Грабовец жылэхэр зэпызыщIэ автомобиль гъуэгуу километри 7 зи кIыхьагъыр.
Дзэлыкъуэ куейм и гъуэгуу иджырей уэздыгъэхэмкIэ къагъэнэхунущ километр 27-рэ зи кIыхьагъыр. Абы хохьэ Дзэлыкъуэ, Светловодскэ, ЯтIэкъуэ, Бэтэх, Псынэдахэ, Дзэлыкъуэдэс, Къармэхьэблэ жылагъуэхэм я щIыпIэ гъуэгухэр.
Апхуэдэ лэжьыгъэхэр щекIуэкIынущ Iуащхьэмахуэ районми. Абы хиубыдэнущ ЛашкIутIэ, Бахъсэн Ипщэр, Iуащхьэмахуэ жылэхэм я гъуэгухэу псори зэхэту километри 8,7-рэ зи кIыхьагъыр.
Тэрч щIыналъэм и жылагъуэхэм ящыщу къуажищым зэхэту километри 5,5-рэ зи кIыхьагъ я автомобиль гъуэгухэр уэздыгъэхэмкIэ къагъэнэхунущ. Шэрэдж куейм ейуэ Старэ Шэрэдж, Жэмтхьэлэ, Сукан-Су къуажэхэр зэпызыщIэхэр, Бахъсэн куейм хыхьэ Зеикъуэ жылэр. Мыбыхэм псоми зэхэту гъуэгу километри 8,8-м щIигъум щелэжьынущ - жэщым тыншу ущызекIуэн хуэдэу уэздыгъэхэр щыфIадзэнущ.
Апхуэдэ щIыкIэкIэ, гъуэгухэр зэIузэпэщ щIыным, абыхэм шынагъуэншагъэр къыщызэгъэпэщыным ехьэлIауэ лажьэ лъэпкъ проектым, нэгъуэщI къэрал программэхэм япкъ иткIэ дызэрыт илъэсым и кIэхэм ирихьэлIэу километр 90-м нэблагъэ, щIыналъэ мыхьэнэ зиIэ автомобиль гъуэгухэр иджырей уэздыгъэхэмкIэ къагъэнэхунущ.
Хьэщыкъуей Олег.