«Синдика» къонакъ юйде санаторийлени аш этиучюлерини араларында «Татлы санаторий» деген ат бла эришиу бардырылгъанды. Анга «Маяк», «Грушевая роща», «Горный родник» санаторийледен эм «Синдиканы» кесинден тёрт къауум къатышхандыла. 
«Горный родник» санаторийни башчысы Олег Безроков бу эришиу кёп жылланы тёрели халда къуралгъанын, жангызда коронавирусну пандемиясы бла байламлы бир кесекни ётдюрюлмей къалгъанын эсгертгенди. «Анга къатышханланы саны жылдан-жылгъа ёсе барсын. Сиз барыгъыз да хорлагъанланы къауумундасыз», – дегенди ол.
Эришиу юч кесекден къуралгъанды. Биринчисинде – «Визитная карторчка» – конкурсантла ишлеген жерлерини, бу усталыкъгъа къалай келгенлерини юсюнден айтхандыла. Экинчисинде аш-азыкъ хазырлау бла байламлы соруулагъа жууапла бергендиле. Ючюнчюсю уа алагъа – къыйын, жюриге уа татлы болгъанды – мында ала стол юсюнден болгъан продуктладан алалгъан затларындан ашла этгендиле. Финалгъа уа ала, кеслеринде юйде хазырлап, миллет азыкъ бла татлы ашарыкъла келтиргендиле. Багъа азыкъны татыууна, ариу жасалгъанына да бичилгенди.
Хорлагъанланы саугъалаугъа курортла эм туризм министр Мурат Шогенцуков да къатышханды, хар командада къайсы ашланы бегирек жаратханын да айтханды. Алай бла «Эм татлы санаторий» деген саугъаны «Грушевая роща» здравница къытханды. «За попадание в яблочко» номинацияда саугъаны «Маяк» алгъанды, аш этиуге чыгъармачылыкъ кёзден къарагъаны ючюн саугъагъа «Синдика» тийишли болгъанды. Тёрелени сакълай билгени ючюн энчи «Горный родник» белгиленнгенди. 
Конкурсха къатышханла, аланы усталыкъларына багъа бичгенле, къонакъла да бу эришиуню тохтатыргъа жарамазлыгъын айтып, аны жылда талай кере окъуна къураргъа боллугъун белгилегендиле.

Хабибуллахланы Зульфия.