Филология илмуланы доктору, профессор, орус эм битеулю тиллени билиу кафедраны башчысы Башийланы Светлана кёп магъаналы китапланы дуния жарыгъын кёрюулерине себеплик этеди.
Тёртюнчю июльда 2022 жылда да Светлана Къонакъбиевна Къабарты-Малкъар къырал университетни алимле советини жыйылыуунда Иосиф Бренерни «Эстер Розенталь-Шнейдерман. Личный архив и биробиджанский след» деген китабыны кёргюзтюуюн къурагъанды. Бу кюнледе уа КъМКъУ-да студентлеге деп презентация ётгенди.
Келгенлеге Светлана Къонакъбиевна бла вузну кадрла эм къурау право жаны бла проректору Мурат Гукепшоков китапны юсюнден айтхандыла. Чыгъарманы баш жигити Сарра Моисеевна Шнейдерманды, ол Совет Союзну илму жаны бла айныууна уллу къыйын салгъан алимледен бириди.
Сарра Моисеевна 1938 жылда Нальчикге келип, школлада математикадан дерсле берип тургъанды. Уруш башланып, эвакуациягъа Къыргъызстаннга кетерге тюшгенликге, устаз 1943 жылда артха республикагъа къайтып, жарыкъландырыу ишин андан ары бардыргъанды. Кёп жылланы университетде ишлеп тургъанды.
Жыйылыуну бардыргъанла, быллай инсанланы таныргъа, аланы этген ахшылыкъларын билирге тийишлисин чертип, Шнейдерман КъМКъУ-ну айтхылы адамларындан бири болгъанын белгилегендиле. Ызы бла алим тиширыуну жашау жолуну юсюнден жарашдырылгъан видеоролик кёргюзтюлгенди.
Темуккуланы Амина.
Сурат авторнуду.