Сабий фахмулу болса,  аламатды, алай ол аны  кеси да ангылап, усталыгъын айнытыргъа амал этсе, бютюнда иги жетишимлеге  жетериги  баямды.  Бу  кюнледе  Къабарты-Малкъар Республиканы  Культура  айнытыу  арасында  кёрмюч  ачылгъанды. Анда   Ахкёбекланы  Салиманы  ишлери бла  шагъырейленирге  амал  болгъанды. 
Анда аны  кёп  аламат суратлары кёргюзтюлгендиле. Къызчыкъгъа онтёрт жыл болады. Алай алыкъа  сабий  эсе да, ол хунерли  жаш тёлюденди. Аны  ишлеринде  гюлле, шауданла тюз жанлары болгъанлагъа  ушайдыла.  Дагъыда аны чыгъармаларында  тёгерегин  суу  алып  тургъан  Венецияны,   къатларында таза  кёк  бетли  шаудан акъгъан къарлы тауланы кёресе, кесинги да тюз да аланы арасында тургъанча сунаса.  Ариу  табакъгъа салынып   тургъан  татыулу  кёгетле,  къыш  сууукъда  жылы юйде  жукълап  тургъан  сары  тюрсюнлю  киштикчик - ала  хар  бири да къараучуну  сейирсиндирген  ишле болгъанларын  кёрмючге  келген  устала да  чертгендиле. 
- Мен бу усталыкъны кесими таныгъанымдан бери сюеме. Бу ишлерими  ичинде эм биринчи  таула  бла  суратды.  Бек жаратханым а гюл къысымы болгъан.  Аны  бояулары да кесим сюйгенчала болуп, ала  бла  да  эркин  хайырланып,  кёп  ариу  тюрсюн  къошханым  ючюн  сюеме. Мындан ары  жашаууму  да бу усталыкъ бла  байларгъа  умутлума.  Бусагъатда кёп жангы  технологияла  бардыла. Жангыз холстда ишлегенден сора да, компьютер графика бла этилген аламат суратла да керек боладыла.  Аны   себепли мындан ары да бу иш бла байламлы окъуугъа барыргъа сюеме,- дегенди  Салима. 
Къызчыкъны  анасы  Локияланы  Жаннета аны  бу  усталыкъгъа  фахмусу   юч  жылындан да белгили  болгъанын  билдиреди.  «Гитче  заманында  къолуна  къалам  алып, сейир  затла  ишлерге  кюрешгенди.  Эслирек болгъанында, кеси аллына юйренип, кёп аламат сурат этип тургъанды. Аны бла чекленмей, республикалы эришиуледе да биринчи жерлеге тийишли болуп тургъанды.  Фахмусун айнытыргъа  белгили суратчыбыз Ахматланы  Лиуаннга  дерслеге  жюрюп  башлагъанды», - дейди ол къысха ушагъыбызда.  
Жаннета араны башчысы Саида Жанимовагъа кёрмючню къурагъаны ючюн ыразылыгъын да билдиреди. Салима мында окъумагъанлыкъгъа, къызчыкъны ишлерин жаратып, бу жумушну къураргъа ол себеплик этгенди. 
Салиманы биринчи энчи кёрмючю бла алгъышларгъа Ахматланы Лиуан да келгенди, ол къызчыкъгъа деп хазырлагъан ишин да  саугъалагъанды анга.  Бусагъатда суратчыгъа  юйренирге жюрюген сабийлени саны къыркъдан асламды.  «Бир-бирлени къатларына сюелип,  ангылатып  турургъа  керек  болады.  Алай Салимагъа къалай этерге кереклисин айтып кетсем, ол аны кеси аллына аламат тамамлап къояды», -деп, анга мындан ары аны энчи  кёрмючлери  кёпден-кёп    боллукъларын,  бу  усталыкъ  бла  бийик  даражагъа  да  жетерин да  тежегенди.
 Ызы бла къызчыкъны аппасы Локияланы Рашид да келгенлеге ыразылыгъын билдирип, хар ата-ана да баласыны  жетишимлерине къууаннганлай турсун, деп алгъыш этгенди.

Темуккуланы Амина.
Сурат авторнуду.