КъМР-ни Парламентини Председатели Татьяна Егорованы башчылыгъында президиумну кезиулю жыйылыуу болгъанды.
Аны аллында спикер Аграр соруула, табийгъатны хайырланыу, экология эм тёгерекдеги къудуретни сакълау жаны бла комитетни башчысыны орунбасары, «Зеленые» партияны фракциясыны таматасы, биология илмуланы доктору Сафарби Шхагапсоевни Орус ботаника обществону вице-президентини къуллугъуна салыннганы бла алгъышлагъанды. Татьяна Борисовна анга жетишимле, муратлары толурларын тежегенди.
Парламентарийле «Женгил таксиде адамланы жюрютюуню эм жюклени ташыуну жорукъларын бирге келишдириуню юсюнден» законну проектине къарагъандыла. Промышленность, транспорт, связь эм жол мюлк жаны бла комитетни башчысы Байдаланы Салих айтханыча, республикалы законопроектни КъМР-ни Правительствосу кёргюзтгенди. Ол 2022 жылда 29 декабрьде чыгъарылгъан «РФ-де женгил таксиде адамланы жюрютюуню эм жюклени ташыуну юсюнден» 580-ФЗ номерли федерал законну толтурур мурат бла хазырланнганды.
- Анга кёре КъМР-ни Правительствосуну эмда сейирлери болгъан органланы инсанланы жюрютюу эм жюклени ташыу жаны бла жууаплылыкълары белгиленедиле. Дагъыда бу иш бла кюреширге жарагъан болжалла да тохташдырылгъандыла – организациялагъа бла энчи предпринимательлеге – 5 жыл, инсанлагъа - 5 жыл (заявленияда инсан башха болжалны белгилемеген кезиуледе). Андан сора да, таксини жумушларыны багъаларын ачыкъ этиуню жорукълары да тохташдырыладыла,-дегенди депутат.
Законну проекти сейирлери болгъан органланы къарауларына тюзетиуле бла эсгертиуле хазырлар ючюн берилгенди.
Депутатла федерал законланы проектлерине да къарагъандыла. Алада сёз коррупциягъа къажау мадарланы, РФ-де туризмни къурауну, къонакъ юйледе толтурулгъан жумушланы юслеринден барады.
Ахырында билим бериуде, эл мюлкде, физкультурада, спортда, башха бёлюмледе жетишимле болдургъанланы КъМР-ни Парламентини Сыйлы грамотасы бла саугъалауну юсюнден оноу къабыл кёрюлгенди.
КъМР-ни Парламентини
пресс-службасы.