РФ-ни Къырал Думасыны депутаты Виктория Родинаны башламчылыгъы бла Россейни Пенсиячыларыны союзуну Прохладна районда бёлюмюню келечилерине финанс къоркъуусузлукъну дерси къуралгъанды. Аны банкладан бирини жууаплы къуллукъчулары бардыргъандыла. 
- Тамата тёлюге  къайгъырыу «Единая Россияны»  баш борчларындан бириди. Партияны халкъ программасында пенсиячыланы жашау болумларын игилендириуге, медицина излемлерин тамамлаугъа эмда финанс билимлерин кенгертиуге бла къоркъуусузлукъну жорукъларына юйретиуге энчи магъана бериледи,-дегенди депутат.
Дерсни кезиуюнде таматалагъа ахчалары бла файдалы хайырланыуну жорукъларын билдиргендиле. Банкны къуллукъчулары къоркъуусузлукъну жорукъларын эсгертгендиле, хыйлачыланы алдауларына тюшмезге юйретгендиле. 
- Дерсге таматаланы сейирлери уллу болгъанды. Ала хыйлачылагъа тюшмеуню мадарларына бютюнда бюсюрегендиле. Быллай тюбешиуле финанс жумушланы, банкла тамамлагъан ишни юсюнден толу эм керти хапар алыргъа онг бередиле,-дегенди  ахырында Виктория Родина.

Тикаланы Фатима хазырлагъанды.