Бу жол Ташлы-Талагъа баргъаныбызда, мектепни директоруну къуллугъун толтургъан Цаколаны Мусса бла ушакъ этгенбиз. Жангы мектепни дерс бардыргъан класслары бла да аны биргесине айланып шагъырей болдукъ. Терен билим алыргъа бек тынгылы онгла бардыла мында. Дерслеге 113 сабий жюрюйдю, устазла уа 19 бардыла. Быйыл биринчи классха келгенле да алтаулан боладыла. Дерсни кезиуюнде ала къалай хазырланнганларын билир ючюн, хар бирин да соруп чыгъаргъа къолдан келликди. Аллай сурам болгъан жерде уа сабий окъуугъа кёл саллыкъды.
Жангы мектепде къурулуш ишлени бошап, аны хайырланыугъа 2019 жылда берген эдиле. Беш жылны ичинде жетишимлени айта, Мусса былай деди:
– Биологиядан, химиядан, физикадан дерсле бардыргъан класслагъа тынгылы ремонт этилгенди, реактивле да алыннгандыла. Бизни гинжи театрыбыз да барды. «Успех каждому» деген программагъа кёре мажаргъанбыз гинжилени. Сабийчикле орус халкъ жомакълагъа кёре оюнла сала тебирегендиле.
Астемир Батуев Аргудандан келип, фахмулу окъуучуларыбызны къобуз согъаргъа юйретеди. Орус адабият бла ингилиз тилден олимпиадалагъа къатышып, Алтууланы Арсен, Уазыкланы Аида, Сараккуланы Мариям айырмалы болгъандыла. Миллет тепсеуледен «Ас-салам» ансамблибиз айырмалыды. Тепсеучюлерибиз хунерлерин республикадан тышына барып да кёргюзтгендиле. Волейболдан командабыз да атларын дайым айтдыргъанлай турадыла. Спортну бу тюрлюсю бла кюрешген айтхылыкъ команда шёндюча тынгылы ойнар жерибиз болмагъан кезиуде да къоймагъанды жарауларын. Окъуучуланы саулукъларына дайым эс бурулады. Мектепде тишлеге бакъгъан врач да ишлейди. Диана Елеева ол жаны бла тынгылы специалистди.
Бийик билим алыуда, ишде да айырмалы окъуучуларыбызны атларын не заманда да ёхтемленип айтабыз. Цаколаны Илияс бла Ислам Москвада Бауман атлы техника университетни бошагъандыла, къыралны ара шахарында ишлейдиле. Цаколаны Назиля Москвада Склифосовский атлы медицина институтну нейрохирургия факультетинде окъуйду. Уазыкланы Ахмат, аны эгечи Алина Москвада тишлеге бакъгъан врачлагъа окъуп, ишлерге анда къалгъандыла. Таукенланы Азамат да ол усталыкъны сайлагъанды. Гюзюланы Хусей Нальчикде «Кюн шахарда» биологиядан, экологиядан окъутуп тургъанды, энди уа Сочиде «Сириус» арагъа кёчюп, ёсюп келген тёлюге анда билим береди.
Аскер училищелени бошап, Россейни Сауутланнган Кючлеринде къуллукъ эте тургъан жашларыбыз а быладыла – Хулчаланы Марат, Къазийланы Алим, Къазийланы Темирлан, Мамайланы Мухаммат, Гузойланы Алий.
Гюзюланы Омар а Москвада къурулуш компанияда прорабды. Курданланы Азнор Ставрополь крайда жолла ишлеген организацияда прорабды.
Гитче элчикде быллай бир билимли адам болгъаны ёхтемлендиреди. Энди мында билим алгъанладан бирлери ёз мектеплерине устазла болуп къайтырла деп уллу ышаныудадыла.
Мамайланы Алий.