Къырал жумушланы тамамлагъан «Госуслуги» порталны къоркъуусузлу хайырланырча, ары сизни атыгъыз бла аманлыкъчыла кирмезча сакъ болургъа керекди. Бу жаны бла бек хайырлы амал – сиз ким болгъаныгъызны системагъа эки кере билдирип ары алай кириудю. Шёндюге дери аны кесигиз сюйгенигизча хайырланыргъа боллукъ эдигиз, алай биринчи октябрьден башлаб а ол хар кимге да борчлу излем болгъанды.

Эки кере билдириу дегенни магъанасы неди: система парольну соргъандан сора сизге СМС жиберип, анда болгъанны жазыгъыз деп излейди. Аны уа порталда аккаунтну керти иеси билликди, аманлыкъчыгъа ол СМС жетерик тюйюлдю.

Бу амал ишлер ючюн, энчи кабинетде Профиль → Безопасность → Вход в систему бёлюмге киригиз. Ызы бла «Вход с подтверждением» дегенни сайлап, анда (СМС келлик) телефон номеригизни кёргюзтюгюз. СМС келгени бла аны ары жазыгъыз.

Бу ишни заманында этмесегиз, порталгъа кеси атыгъыз бла кирирча СМС-билдириуню, ТОТР-приложениядан бир кере берилген кодну неда биометрияны хайырланыргъа керек боллукъду.

СМС шагъатлыкъны жарашдыргъан кезиуде бир тюрлю чырмаула чыкъсала МФЦ-гъа барыгъыз.

Улбашланы Мурат хазырлагъанды.