Нальчик шахарны мектепге дери билим берген махкемелерини арасында Юйретиучюню кюнюне аталып сурат ишлеуден эришиу болгъанды. Конкурс «Мени сюйген юйретиучюм» деген ат бла бардырылгъанды эмда анга къатышхан сабийле суратланы ата-аналарыны болушлукълары бла бирге этгендиле.

Жашчыкъла бла къызчыкъла кеслерини ишлеринде тёгерекдеги дунияны къалай кёргенлерин эмда сезгенлерин ачыкълагъандыла. Алада таза ниетлилик да эсленеди, нек дегенде сабийледе башха тюрлю болмайды.

Юйретиучю – ол магъаналы усталыкъды, ала кеслери да сабийлени сюйгенледиле, алайсыз бу ишни сайларгъа да къыйынды. Аны себепли ала сабийликни дуниясында тургъанчадыла. Бу усталыкъны магъанасын, аны теренлигин гитчечиклени алагъа ышаныулукълары бла къарагъан кёзчюклеринден да ангылайса.

Сагъынылгъан конкурсну мураты уа юйретиучюню даражасын кётюрюу, анга хурмет бериу, ол бардыргъан ишни къыйматын ангылатыу эмда сабийлени кеслерини чыгъармачылыкъ жаны бла хунерлерин айнытыу  бла байламлы болгъанды. Комиссиягъа эришиуге къатышыргъа излегенлерин 26 жерден билдирген эдиле. Алагъа барысына да эркинлик берилгенди.

Алай бла конкурсда биринчиликни 64-чю номерли сабий сад алгъанды. Ала анга «Сюйген юйретиучюм бла бирге хауада зауукълу солуу» деген иш бла къатышхандыла.

Экинчи оруннга уа биринчи номерли прогимназия тийишли болгъанды. Ала уа ишлеген суратларына «Мени сюйген юйретиучюм» деп атагъандыла.

Эришиуде ючюнчюле уа 77-чи сабий сад болгъандыла. Бу махкеме уа анга «Сюйген юйретучюбюз бла хауада солуйбуз, жырла да айтабыз!» деген ишин жибергенди.

Белгиленнген садикле Нальчик шахар администрацияны билим бериу департаментини грамоталары бла саугъаланнгандыла.

Мокъаланы Зухура.