30 сентябрьде РФ-де жангы байрам белгиленирикди - Донецк Халкъ Республика, Луганск Халкъ Республика, Запорожье область эм Херсон область артха Россейге къайтханларыны кюню. Ол жаны бла Указгъа бу кюнледе РФ-ни Президенти къол салгъанды.
Бу тарых магъаналы ишге аталып, «Единая Россия» политика партияны КъМР-де регион бёлюмю суратланы кёрмючюн къурагъанды. Ол партияны башчысыны жамауат приёмныйинде ачылгъанды. Кёрмючге Къабарты-Малкъар Херсон областьда шеф болушлукъ этген регионланы алгъын болумларыны бла шёндюгю тюрлениулени, къарындаш халкъгъа жандауурлукъ жюкле къалай къуралгъанларыны юслеринден суратла киргендиле.
Партияны регион бёлюмюню секретарыны орунбасары, КъМР-ни Парламентини депутаты Дмитрий Парафилов айтханыча, алай бла къыралны жангы регионларыны экономика, эл мюлк, культура онгларын билдирирге кюрешгендиле. «Республика Херсон областьха шеф болушлукъ этеди да, ол себепден бу жерледе бизни къауумла кёп кере болгъандыла. Жандауурлукъ болушлукъдан сора да, энчи аскер операцияны кезиуюнде оюлгъан мекямланы жангыртабыз. Аны юсюнден суратла бардыла кёрмючде. Алай бла биз жангы регионланы онгларын кёргюзтюрге сюйгенбиз. Алада уа орта эсеп бла 6 миллион адам жашайды. Аланы промышленный, эл мюлк, илму, туризм жаны бла да онглары уллудула. Бизни республиканы жамауаты жангы регионланы юслеринден толуракъ билирле бу кёрмючню себеплиги бла деп ышанабыз»,-дегенди Дмитрий Парафилов.
Кёрмючню ачылыууна КъМР-ни миллетлени ишлери эм жамауат проектле жаны бла министри Анзор Курашинов да къатышханды. Ол кеси жангы регионлада кёп кере болгъанды. Алгъаракълада уа Скадовск районда жаш тёлю фестиваль къуралгъан эди, анга Къабарты-Малкъарны жаш адамлары да къатышхандыла. «Ала бир бирлери бла танышхандыла, биз анда республиканы халкъларыны культурасын, аш-сууун да кёргюзтгенбиз. Фестивальгъа келгенлени бизни республикагъа сейирлери уллу болгъанын айтырчады»,-дегенди.
Анзор Курашинов бюгюнлюкде жангы регионлада иги жанына тюрлениуле болгъанларыны юсюнден да айтханды. «Биринчи кезиуде мен кёрген къарангылыкъ жокъду, анда жашау жангыдан башланнганды. Аны адамлары Россейни деменгилилигин, халкъыны ариулугъун, къонакъбайлыгъын сезгендиле. Ол а бек магъаналыды»,-дегенди министр.
Партияны башчысыны жамауат приёмныйини таматасыны орунбасары Хасанби Абазов, жангы регионладан келип, КъМР-де жашагъан инсанлагъа болушлукъну юсюнден айтханды. Ол санда алагъа документлерин жангыртыргъа, жашау болумларын игилендирирге себеплик этилгенди. «Аскер операция бошалгъандан сора жангы регионла бла къарындаш байламлыкъла андан да бек кючленирикдиле. Бизни адамла ары барып, андан бизге къонакъла келип, бир бирибизни иги танырбыз деп ийнанама»,-дегенди ол.
Тикаланы Фатима.
Сурат авторнуду.