Къабарты-Малкъар Республиканы Башчысы Казбек Коков республиканы школгъа дери билим бериу махкемелеринде ишлегенлени профессионал байрамлары бла алгъышлагъанды. Республиканы оноучусуну алгъышлауунда былай айтылынады: «Россейде Юйретиучюню эмда школгъа дери билим бериуде ишлегенлени барысыны да кюнню белгилегендиле. Биринчи кере Юйретиучюню кюнюн белгилеу Санкт-Петебургда 2003 жылда къуралгъанды, ол шахарда биринчи сабий садны ачылыууна 140 жыл толгъанына аталгъан эди. 2016 жылда Россейни Правительствосуну буйругъуна кёре РФ-ни Билим бериу эм илму министерствосуну приказы бла ол официал даражалы болгъанды.
Къабарты-Малкъарда 266 школгъа дери билим берген организация ишлейди, анда 3441 юйретиучю эмда 4198 устаз урунады, битеу да бирге системада 8527 специалист ишлейди. Сабий садлагъа бизде 47575 жашчыкъ бла къызчыкъ жюрюйдюле. Школгъа дери билим бериу асламлагъа жетерча, биз «Демография» миллет проектни онгларын битеу хайырланнганбыз. 2019 жылдан башлап школгъа дери билим берген 50 махкеме ишленнгенди, алада 3 жылларына дери 2 980-ден артыкъ сабий юйренеди.
Школгъа дери юйретиуню эм билим бериуню магъанасы уллуду, ол кезиуде къураладыла сабийде школда окъутууну мурдору боллукъ ангылаула, адамла арасында кесин жюрюте билиу да. Ол жумушда уллу магъананы юйретиучюле бла школгъа дери билим берген махкемеледе ишлеген устазла тутадыла.
Битеу жюрегимден школгъа дери билим бериуде ишлегенлени профессионал байрамлары бла алгъышлайма. Гитчелеге, жаш инсанлагъа юйретиучю эмда устаз болуу даражалы атды, жууаплылыкъды.
Сизни огъурлулугъугъузгъа, акъылыгъызгъа, хар сабийге эс бёле билгенигизге кёре боллукъду тамблагъы кюн. Сиз бересиз кюн сайын сабийлеге жюрек жылыуну, аланы ариу къылыкъгъа юйретип, жангы затха юйренирге кёллендиресиз, жетишимлеге итиндиресиз.
Огъурлу къыйыныгъыз, ишигизге сюймеклигигиз, сабийлеге къайгъырыуугъуз ючюн жюрек ыразылыгъымы билдирирге излейме. Битеу юйретиучюлерибизге бла школгъа дери билим бериуде ишлегенлеге саулукъ-эсенлик, юйретген сабийлеригизни жанындан сюймеклик, ата-аналадан а ыразылыкъ тежейме. Байрам бла алгъышлайма!»
