Тхьэмахуэ къэс екIуэкI «муниципальнэ сыхьэт» зэIущIэр зэхишащ КъБР-м и Iэтащхьэ КIуэкIуэ Казбек. Абы хэтащ КъБР-м и Правительствэм и УнафэщI Мусуков Алий, республикэм и Iэтащхьэм и Администрацэм и УнафэщI Къуэдзокъуэ Мухьэмэд, министрхэр, щIыналъэ администрацэхэмрэ къалэ округ-
округхэмрэ я унафэщIхэр.
Зытепсэлъыхьыпхъэ Iуэхухэм ящыщу мыхьэнэ нэхъ зратхэм язт дзэ Iуэху хэхам хэт зауэлIхэм я сабийхэр зыхуей хуагъэзэн папщIэ, иджыблагъэ КIуэкIуэ Казбек и унафэкIэ ирагъэжьа «Зауэм и бынхэр» проектым и лэжьэкIэр. Абы теухуауэ къэпсэлъащ КъБР-м егъэджэныгъэмрэ щIэныгъэмкIэ и министр Езауэ Анзор, КъБР-м и Iэтащхьэм и чэнджэщэгъу Миронов Николай, лъэпкъ Iуэхухэмрэ жылагъуэ проектхэмкIэ министр КIурашын Анзор, щIалэгъуалэ IуэхухэмкIэ министр Лу Азэмэт сымэ.
Проектым ипкъ иткIэ, дзэ Iуэху хэхам хэтхэм я сабийхэм кураторхэр, кIэлъыплъакIуэ щхьэхуэхэр хуагъэувынущ, псори школым епхауэ. Iуэхум хэпщIауэ щытынущ куратор мини 5,8-м нэс - гъэсакIуэхэу, егъэджакIуэхэу, муниципальнэ лэжьакIуэхэу, спортымкIэ тренерхэу.
ГъэсакIуэхэмрэ егъэджакIуэхэмрэ лэжьыгъэм хуагъэзыращ, щхьэж и унэтIыныгъэм елъытауэ. ЕгъэджэныгъэмкIэ курсхэм я зыр щекIуэкIынущ «Мэшыкъуэ» щIэныгъэ центрым. Программэм хэтщ лекцэ къеджэныр, гъащIэм къыщыхъу щытыкIэхэм хуэгъэсэныр, псэлъэкIэ егъэщIэныр.
КIуэкIуэ Казбек къыхигъэщащ «Зауэм и бынхэр» проектым ипкъ иткIэ къыдэкIуэтей щIэблэм иджыпсту зэрадэлажьэ Iэмалхэр иужькIэ щытыкIэ гугъум ихуа сабийхэм епхьэлIэ зэрыхъунур. Къэралымрэ жылагъуэмрэ къатохуэ узыхуэсакъыпхъэ щытыкIэм ихуа сабийхэр гуп мыхъумыщIэхэм яхэмыхуэн папщIэ, якIэлъыплъыну.
Къызэхуэсахэр тепсэлъыхьащ Унагъуэм ехьэлIапхъэ чэнджэщхэмкIэ центр къызэбгъэпэщ зэрыхъунум, ар гъэсэныгъэм къызэрыщысэбэпынум.
И гугъу ящIащ республикэм ис щIалэгъуалэм Урысейм зэрыщыщыр зыхащIэу къыдэкIуэтеиным елэжьын зэрыхуейми. Iуэху еплъыкIэхэмкIэ зэдэгуэша нэужь, дэтхэнэ проектми иджыри хэплъэжынущ.
Гулъытэ щхьэхуэ хуащIащ лъэпкъ, федеральнэ проектхэм къызэщIаубыдэ ухуэныгъэхэр зэIузэпэщ щIыжын зэрыхуейм. Абыхэм яхеубыдэ цIыхухэм япэ медицинэ Iуэхутхьэбзэ щагъуэт IуэхущIапIэхэр, щэнхабзэм, спортым епхахэр, коммунальнэ, гъуэгу инфраструктурэм зыщрагъэужьхэр. Республикэм и Iэтащхьэм унафэ ищIащ къалэн зыщащIыжа дэтхэнэ лэжьыгъэри и пIалъэм зэфIагъэкIыну.