Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым иджыблагъэ щызэхэтащ «Мэшыкъуэ-2019» щIалэгъуалэ зэпеуэм зыщыхуагъэхьэзыр зэхуэс. «ПредМашук» цIэр зыфIаща зэхыхьэм студентхэр щаIущIащ УФ-м ЩIалэгъуалэ IуэхухэмкIэ и федеральнэ агентствэм и лIыкIуэхэмрэ «Мэшыкъуэ-2019» щIыналъэпсо зэпеуэм и къызэгъэпэщакIуэхэмрэ.
Зигурэ зи щхьэрэ зэтелъ, гушхуэ-ныгъэ зыхэлъ зи щIалэгъуэхэм я куэдт зытепсэлъыхьынрэ зыщIэупщIэнрэ. А псомкIи абы зыхуагъэзащ КъБР-м цIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министрым и къуэдзэ Мокаев Ашэмэз, «Мэшыкъуэ-2019» форумым и унафэщI Донецкий Дмитрий, абы шынагъуэншагъэмкIэ и къуэдзэ Кайманов Владимир, форумым и экспертхэу, кураторхэу Сонинэ Еленэ, Кулиевэ Иннэ, хъыбарегъащIэ IуэхухэмкIэ къудамэм и пашэ Черновэ Анастасие сымэ, нэгъуэщIхэми.
- Нобэрей зэхуэсым кърихьэлIа псоми сэлам гуапэ фызох. Утыку къифхьа проектыщIэхэм ящыщ куэдым хьэлэмэтагърэ щIэщыгъуагърэ зэрахэлъым шэч къытесхьэркъым. Абы гугъэ сегъэщI ди зэIущIэм къекIуэ-лIа щIалэгъуалэм я нэхъыбапIэр «Мэшыкъуэ-2019» щIыналъэпсо зэхыхьэм хэтыну Iэмал яIэну, - апхуэдэ пэублэ псалъэкIэ къызэхуэсахэм захуигъэзащ Мокаев Ашэмэз. - Адрей илъэсхэм хуэмыдэу, мыгъэрей зэпеуэр щытынущ куэдкIэ нэхъ гъэщIэгъуэну, и къызэгъэпэщыкIэкIи и купщIэкIи. Фыкъеблагъэ зи юбилейр мы гъэм зыгъэлъапIэ щIыналъэпсо зэхыхьэм.
«Мэшыкъуэ-2019» зэхуэсыр зэрекIуэкIыну щIыкIэм нэхъ зэпкърыхауэ тепсэлъыхьащ Донецкий Дмитрий. Абы зэрыжиIамкIэ, щIалэгъуалэ форумыр къызэIуахынущ шыщхьэуIум и 9-м икIи а мазэм и 30 пщIондэ екIуэкIынущ. Ар Iыхьищу зэщхьэщыхауэ щытынущ. Япэ сменэм и къыхуеджэныгъэр - «Пэрытхэм къызэщIаубыдэ унэтIыныгъэхэр» - жыхуиIэр шыщхьэуIум и 9 - 16-хэм екIуэкIынущ. Абы къыкIэлъыкIуэнущ «Граждан жылагъуэ» унэтIыныгъэм щIэту къызэгъэпэща лэжьыгъэр. Ар шыщхьэуIум и 16 - 23 махуэхэм щыIэнущ. Форумым и иужьрей теуэгъуэр, «Сэ сыпэрытщ!» фIэщыгъэр зиIэр, шыщхьэуIум и 23 - 30-хэм къызэрагъэпэщынущ. Псори зэхэту форумым хэтынущ цIыху 3000-м нэс, мин зырыз зэхыхьэ къэс хуэзэу.
«Мэшыкъуэ-2019» зэхыхьэм щекIуэкIыну лэжьыгъэ псори къызэщIеубыдэ абы и къыхуеджэныгъэ нэхъыщхьэм: «Урысеймрэ сэрэ ттеухуауэ».
Зэхуэсым и къызэгъэпэщакIуэхэщ, хабзэ зэрыхъуащи, УФ-м и Президентым Кавказ Ищхъэрэ федеральнэ щIыналъэм щиIэ лIыкIуэм и Аппаратыр, УФ-м Лъэпкъ IуэхухэмкIэ и федеральнэ агентствэр, УФ-м ЩIалэгъуалэ IуэхухэмкIэ и федеральнэ агентствэр, Ставрополь крайм и Правительствэр. Абыхэм зэрыжаIэмкIэ, мыгъэрей зэхуэсыр егъэлеяуэ купщIафIэу, сэбэпу щытынущ. Абы и къалэн нэхъыщхьэр щIыналъэм и щIалэгъуалэм яку ныбжьэгъугъэ, зэгурыIуэныгъэ дэлъхьэнырщ, апхуэдэуи гупсысэ жан зыбгъэдэлъ щIалэгъуалэр наIуэ къэщIынырщ, иужькIэ ахэр лэжьыгъэ IэнатIэ тэмэмкIэ къызэгъэпэщынырщ.
Форумыр зэрекIуэкIынум теухуауэ къызэхуэсахэм епсэлъылIахэм ящыщщ Сонинэри, Каймановри, Кулиевэри. Абыхэм я къэпсэлъэныгъэхэм къарикIуа упщIэхэм жэуап зэпкърыхахэри ягъуэтащ
«Мэшыкъуэ-2019»-м хуэзыгъэхьэзыр апхуэдэ зэхуэс иджыри щыIэнущ дызэрыт мазэм и кIэух махуэм ирихьэлIэу. Зи проектыщIэхэр абыхэм ехъулIэныгъэкIэ щыпхызыгъэкIыф щIалэгъуалэр щIыналъэпсо зэхыхьэм ирагъэблэгъэнущ.