УФ-м ЩIалэгъуалэм я IуэхухэмкIэ и федеральнэ агентствэм щекIуэкIа иужьрей зэIущIэм щыхэплъэжащ ЩIалэгъуалэ проектхэм я урысейпсо зэпеуэм кърикIуахэм. Ди гуапэ зэрыхъущи, гъуэгу зратыну проектхэу къэрал мылъку зыхухахахэм яхэхуащ ди республикэм икIа лэжьыгъи 9.
Фигу къэдгъэкIыжынщи, зэпеуэр къыхалъхьащ мы гъэм и гъатхэм. Абы хэтыну гукъыдэж зиIэхэм дэфтэрхэр мэлыжьыхь - накъыгъэ мазэхэм ягъэхьащ «Урысейм и щIалэгъуалэ» агентствэм. БлэкIа илъэсхэм еплъытмэ, мы гъэм лъэIу тхылъу ятар куэдкIэ нэхъыбэт: къэралым и щIыналъэ 85-м къикI проект 8611-рэ хъурт псори зэхэту. Абыхэм хэплъащ зэпеуэм къыхузэрагъэпэща къэпщытакIуэ гуп щхьэхуэр. А экспертхэм зэраубзыхуамкIэ, къэралым мылъкукIэ диIыгъынущ зи ныбжьыр илъэс 14-м къыщыщIэдзауэ 30-м нэсхэм къабгъэдэкIа проект нэхъыфIу 820-рэ.
Къэбэрдей-Балъкъэрым икIа проектхэр псори зэгъусэу 100-м нэсырт. Ди гуапэ зэрыхъущи, абыхэм ящыщу 9-м мылъку хухахащ. Зи проект жэрдэмхэр нэхъы-фIу къалъыта ди лъахэгъухэм яхэтщ КъБКъУ-м и IэщIагъэлIхэмрэ студентхэмрэ ягъэхьэзыра лэжьыгъи 4. Псори зэхэту абыхэм къыхуаутIыпщащ сом мелуани 3-рэ мин 600-рэ. Ахэр ялъысащ:
Ету Хьэжмухьэмэд Хьэрэбий и къуэм - КъБКъУ-м ЩIалэгъуалэ политикэмрэ гъэсэныгъэ IуэхухэмкIэ и управленэм и унафэщIым и къуэдзэм, «Химие», «Юриспруденцие» унэтIыныгъэхэмкIэ магистратурэм и 2-нэ курсым щеджэм. Проектыр - «PROFориентир»-м хуэгъэпса Iуэхугъуэхэр» - сом 2 000 000.
Хуторская Елизаветэ Вениамин и пхъум - «Филологие. Урысыбзэмрэ литературэмрэ» унэтIыныгъэм и 3-нэ курсым и студенткэм. Проектыр - «ЕгъэджакIуэ ныбжьыщIэхэм я езанэ зэхуэс «Призвание» - сом 800 000.
Савельев Георгий Олег и къуэм - «Менеджмент», «Юриспруденцие» унэтIыныгъэхэмкIэ магистратурэм и 2-нэ курсым щеджэм. Проектыр - «Къэбэрдей-Балъкъэр Республикэм и щIалэгъуалэм я шынагъуэншагъэр» - сом 600 000.
Iэрэмысэ Тимур Руслан и къуэм - «Социальнэ лэжьыгъэ» унэтIыныгъэмкIэ магистратурэм и 1-нэ курсым щеджэм. Проектыр - «АдыгэбзэкIэ дебатхэр» республикэпсо щIалэгъуалэ зэпеуэ» - сом 200 000.
Зи жэрдэмхэм къэрал дэIыгъыныгъэ игъуэтахэм ди гуапэу дохъуэхъу ди щIыналъэр егъэфIэкIуэным, абы зиужьыным яхуэгъэпса мурадхэмрэ хъуэпсапIэхэмрэ къайхъулIэну.