Озгъан ыйыкъда республиканы онбир районунда 37 мектепде «Точка роста» илму эмда технологияла ызлы билим бериу арала ачылгъандыла. Быйыл регионну школлары физика, химия эмда  биология жаны бла оборудование  бла жалчытылыннгандыла. Бу жумуш «Билим бериу миллет проектни «Бюгюннгю школ» федерал проектин жашауда бардырыу бла байламлыды.
Къыралда «Билим бериу» проект 2019 жылда ишин башлагъанды. «Точка роста» араланы ачылыулары сабийлеге, ала къайда жашагъанларына да къарамай,  бюгюнню излемлерине, сурамларына  тийишли битеулю билим алыргъа ахшы онгланы къурайды.
Бюгюнлюкге энди Къабарты-Малкъарны 181 мектебинде бардыла сагъынылгъан арала. Келир жылны ахырына дери уа дагъыда эллерибизде эмда адам санлары аз болгъан шахарларыбызда аланы онючюсюн ачаргъа деп белгиленнгенди. Алай  бла республикада бу жаны бла иш тамамланып бошалгъаннга да саналлыкъды.
Сёз ючюн, Черек районда аллай арала былтыр Бызынгыны бла Зарагижни мектеплеринде ачылгъан эдиле. 2019 жылда уа аланы саны сегизге жетгенди. Быйыл а быллай жерле Жемталаны,  Къашхатауну эмда Къара-Сууну битеулю билим берген школларында къуралгъандыла. Жемталада эки кабинет ачылгъанды-химия эмда биология, физика. Химия бла биологиядан Цийкъанланы Жамиля Ахматовна, физикадан а Атабийланы Фатимат Владимировна юйретирикдиле.
 Районларыбызны юсюнден айтхан заманда 2020 жылда Жангы Малкъарда,  дагъыда Огъары Бахсанны  мектебинде сабийлеге да къуралгъандыла былтыр аллай онгла. Быйыл «Точка роста» ачылгъан окъуу юйлени тизмесинде Биринчи Чегемни бешинчи номерли мектеби да барды.

Мокъаланы Зухура