КИФЩI-м къыщыщIагъэкI хьэпшыпхэм «Продукция Кавказа» («Кавказым щащIащ») сертификатыр къыхуIахын папщIэ, хьэрычэтыщIэхэм лъэIу тхылъхэр ягъэхьэзырыну хуит ящIащ. ЩIыналъэм щыщ хьэрычэтыщIэхэм Iэмал яIэнущ къыщIагъэкIхэр щIыналъэми абы и щIыбми щащэну, ахэр тыкуэнышхуэхэм, жармыкIэ мыхьэнэ зиIэ щапIэхэм къытралъхьэну. ЩэхуакIуэхэм я дежкIи ар хьэпшыпхэм шэч къыщIытумыхьэн нэщэнэу къэувынущ.
«Ди къэралми абы и адрыщкIи цIыхухэм я нэ къыщыхуокI Кавказым къыщыщIагъэкI хьэпшыпхэр зыIэрагъэхьэну. ФIагъым и нэщэнэу къэув сертификатыр хьэрычэтыщIэхэм ядэIэпыкъунущ я хьэпшыпхэр нэхъыфIу къацIыхуным, щапэщIэхэм щIалъхьэным папщIэ. Абыхэм яхохьэ жармыкIэхэр, фестивалхэр, щхьэж зыхиубыдэ къудамэхэм щрагъэкIуэкI дауэдапщэхэр. Ди дежкIэ мыхьэнэшхуэ иIэщ я псэр халъхьэу Кавказым къыщыщIагъэкIа хьэпшыпхэр нэхъ тыншу яхуэщэу тщIыным», - жиIащ Кавказ.РФ IуэхущIапIэм и унафэщI нэхъыжь Цемахович Андрей.
Сертификат къызэрыIахыфыну хьэпшыпхэм яхеубыдэ ерыскъыхэкIхэр, псыр, хьэкъущыкъухэр, унэлъащIэхэр, щыгъыныр, зэрытхьэщIэ химиехэкIхэр, тыгъэхэр, фадэр, ухуэныгъэ хуэIухуэщIэ-хэр.
«Дзэлыкъуэ кIэртIоф» IуэхущIапIэм и унафэщI нэхъыжь БжэныкIэ Руслан апхуэдэ щIэгъэкъуэныр и хьэрычэт Iуэхухэм сэбэпышхуэ хуэхъуу къелъытэ: «Ди гуапэщ Кавказ.РФ IуэхущIапIэм апхуэдэ жэрдэм къызэрыхилъхьар. ЩIыналъэ жыжьэхэм къыщежьэурэщ зыгуэр къыщIэзыгъэкIхэр хуэм-хуэмурэ къэралым къызэрыщацIыхур. «Кавказым щащIащ» брендыр дэни хэIущIыIу щыхъумэ, псом япэ - щIыналъэм и кIуэцIым - абы цIыху нэхъыбэ къыщIэупщIэу хъунущ».
«Хьэпшыпыр къызэрацIыху брендыр хэIущIыIу хъун папщIэ, - жиIащ «Мастер-Прайм. Берёзка» IуэхущIапIэм и унафэщI нэхъыжь Бекузаровэ Ларисэ, - ар къыщыщIагъэкI, апхуэдэ IэщIагъэлI ехьэжьахэр щыпсэу, лэжьыгъэр фIыуэ щалъагъу езы щIыпIэри къегъэцIыхун хуейщ. Кавказ Ищхъэрэм хьэпшыпыфI куэд къыщыщIагъэкI экологие и лъэныкъуэкIэ зэраныгъэ къимышэу. Дыщогугъ «Кавказым щащIащ» фIэщыгъэм ди щIыпIэм щыщ хьэпшыпхэм гу къалъригъатэу, дэри ахэр нэхъ тыншу тхуэщэу дыхъуну».
Дызэрыт илъэсым ЭкономикэмкIэ дунейпсо зэхуэсу Санкт-Петербург щекIуэкIам «Роскачество», «Кавказ. РФ» IуэхущIапIэхэм зэгурыIуэныгъэ щызэращIылIащ дяпэкIэ зэдэлэжьэну.
2023 гъэр имыух щIыкIэ, щIыналъэм щылажьэ хьэрычэтыщIэхэр хуитщ къыщIагъэкI хьэпшыпыр къэпщытэныгъэхэм ирашалIэу, ар зэрыфIым и щыхьэту къэув сертификатыр къыIахыну. Нэхъыбэ къэзыщIэну хуейхэм я упщIэхэм жэуап къыщыхуагъуэтыфынущ «Продукция кавказа.РФ» е «Роскачество» интернет хэщIапIэхэм.
КЪУДЕЙ Iэминэ.