«Каббалкэнерго» компанияны эмда Сюд приставланы федерал службасыны КъМР-де управлениясыны келечилери алгъаракълада бирге рейдле бардыргъандыла. Аланы кезиуюнде талай элде ток ючюн хакъ тёлемей тургъан 367 адамны юйлеринде болгъандыла. Компаниядан билдиргенлерине кёре, аланы барыны да тёрт миллион сом чакълы берликлери барды. Алай сюд оноу этгенликге, ала борчларын жабаргъа ашыкъмай тургъандыла.
Алай бла рейдни кезиуюнде 52 абонент борчларын толусунлай тёлегендиле; ол а 239 минг сом болады. Энтта да 59-суна дау къагъытланы юсю бла приставла мюлклерине арест салгъандыла.
Компанияны таматаларындан бири Аслан Докшукин айтханнга кёре, ала быллай рейдлени приставла бла бирге бардыра туруучудула. Бу иш къыйматлы болгъанын белгилегенди ол.