КъМР-ни Башчысы Казбек Коков Прохладна районну Екатериноградская станицасыны битеулю билим берген мектебинде Билимни кюнюне аталгъан къууанчлы жыйылыугъа къатышханды, деп билдиргендиле республиканы оноучусуну бла Правительствосуну пресс-службасындан. 370 сабий окъугъан школгъа быйыл тынгылы ремонт «Мектепде окъутуу системаны жангыртыу» къырал программагъа тийишликликде этилгенди.
Казбек Валерьевич устазланы, сабийлени, аланы ата-аналарын да окъуу жылны башланнганы бла алгъышлагъанды. Школчулагъа айланып, ол: «Сизни таза жюрекден Республиканы къыраллыгъыны, Билимни кюнлери бла алгъышлайма! Жашнау да тежейме. Кесигизни ата-анагъызны бет жарыкълы этгенле, алагъа махтау келтиргенле эмда бюгюнлюкде бизни деменгили къыралыбызны къоруулагъанлагъа тийишлиле болугъуз. Бу мектепге тынгылы ремонт этиуню проекти бизни къыралыбызны Президенти Владимир Путинни башламчылыгъы болгъанды. Владимир Владимирович ёсюп келген тёлюлеге, сабийли юйюрлеге энчи эс бурады. Бюгюнлюкде биз кёрюп турабыз ол проектле жашауда къалай бардырылгъанларын, сизни школугъуз – ол аллай кёп юлгюден бириди», - дегенди.
Тёрели байрам жыйылыудан, къонгуроу къагъылгъандан сора биринчи классха келгенчиклеге билимни дерси болгъанды.
Республиканы Башчысы мектепни хар жерин да кёрюп, устазла бла да ушакълашханды эмда андан ары да айныр ючюн школгъа дагъыда бир миллион ёлчемде грант да бериллигин айтханды.
Бери сабийле бир сменнге жюрюрюкдюле. 1965 жылда ишленип, хайырланылыргъа берилген юч къатлы мекямны битеу да инженер коммуникациялары, кабинетлери, аш хазырлагъан жери, 90 адам сыйыннган ашханасы, китапханасы, спортзалы, къошакъ билим берген кабинетлери жангыртылгъандыла.
Окъуу кабинетле энчи компьютерле, мультимедиалы проекторла, тагъылыучу экранла бла да жалчытылыннгандыла. Физика, химия кабинетлени кеслерини лабораториялары да бардыла. Мектепге окъуучуланы жюрютюрге улоу да бёлюннгенди. Сабийлеге жылы аш хакъсыз бериледи.