Щхьэхынэхэр бампIэгъуэщ: зралъэфыхьу, гукъыдэмыжу, щылъу, щысу, я Iэр къаIэтын къайхьэлъэкI нэхъей. Ахэр ягъэукIытэн я гугъэу дзы фIащ е ягъэгушхуэ. Ауэ куэдым ящIэркъым щхьэхыр къызыхэкIымрэ ар зищIысымрэ.
ЩIэныгъэлIхэм къызэрахутамкIэ, щхьэхыр псантхуэ системэм къефыкI щытыкIэщ икIи пасэрей зэманым (цIыхухэм шхэнрэ бэгъуэнрэ фIэкIа нэгъуэщI Iуэху щамыIа лъэхъэнэм) къэунэхуа щытыкIэщ. ЦIыхум Iуэху щищIэр зыгуэр щыхуэныкъуэм, а зыхуэныкъуэр нэгъуэщI зыми къыщыхуимыщIэм дежт. Iуэху ущимыIэм деж щхьэкуцIым «зыщIрегъэх», зыгъэпсэху, уи къару хъумэ, жери, Iэпкълъэпкъым унафэ хуещI. Абы лъандэрэ ди щыIэкIэ-псэукIэм зихъуэжащ, цIыхур зыхуэныкъуэмрэ и Iуэхумрэ хэхъуэ зэпытщ, ауэ псантхуэм и лэжьэкIэм зыкIи зихъуэжакъыми, Iэпкълъэпкъым нэхъыбэрэ зригъэгъэпсэхуну хущIокъу.
Псалъэм папщIэ, сабийхэм куэд яхэтщ еджэну, тхэну, лэжьэну хуэмейуэ, щхьэхыу. Ауэ апхуэдэхэр нэжэгужэ дыдэу мэджэгу, дэзыхьэх Iуэхугъуэхэм яфIэфIыпсу пэрытщ. КъызэрыщIэкIымкIэ, апхуэдэ сабийхэм балигъхэм жаIэу куэдрэ зэхах «еджэным псыхэкIуадэ ищIа илъэс бжыгъэхэм», «я псэм дэмыхьэ лэжьыгъэм гугъу зэрыригъэхьым» теухуа хъыбархэр. Ауэ щыхъукIэ, ижь-ижьыж лъандэрэ цIыхум ифI къэзылъыхъуэу къыдекIуэкI псантхуэ системэм упщIэ къегъэув: «Уи фейдэ щыпымылъкIэ, гугъу ущехьынукIэ - умыщIэ, зыгъэпсэху!».
Ауэ щыIэщ гугъуехьышхуэ зыпылъ лэжьыгъэ гуэр ягъэзащIэмэ, абы фIыгъуэ къызэрыпэкIуэнур зыщIэхэр, ауэ гукъыдэж ямыIэу, лэжьыгъэр щIамыдзэфу. Апхуэдэхэм деж цIыхур зыгуэрым щышынэу арауэ жаIэ психологхэм: е къемыхъулIэнкIэ, е нимыщIысынкIэ, е и лэжьыгъэр цIыхухэм ягу иримыхьынкIэ. КъищынэмыщIауэ, цIыхум и акъылыр хутемыухуэу, къыдалъхуа узу, ищIэм тегупсысыкIыу. Мы щытыкIэр нэхъыбэу зыхуэлъэр депрессие зиIэхэращ. Апхуэдэхэм дохутыр зрагъэплъмэ, психолог зрагъэлэжьмэ, псори зэхуэхъужынущ.
ЦIыхур ешами, щхьэхынэ мэхъу. Ар жейкIэ иримыкъумэ, тэмэму мышхэмэ, кофе, тутын, фадэ ефэмэ, махуэм жейрэ жэщым лажьэмэ, и къарур щIокIри, зыри хуэмыщIэу щхьэхынэ мэхъу. Апхуэдэ дуней тетыкIэм цIыхум и Iэпкълъэпкъыр зэрылажьэмрэ и гупсысэкIэмрэ ехъуэжри, ныкъуэдыкъуэ мэхъу.
Психологхэм зэрыжаIэмкIэ, языныкъуэхэм деж щхьэхым лъабжьэ хуохъу и сабиигъуэм цIыхум и гур изыкъутыхьын гуэр и нэгу щIэкIамэ, зэхихамэ, «пщIэр хъуркъым, уеджэфыркъым, ущIыкIафIэкъым, утеплъафIэкъым» жаIэурэ и жагъуэ ящIамэ.
Иужьрей зэманым ирагъэкIуэкIа къэхутэныгъэхэм къагъэлъэгъуащ цIыхум лъатэ уз, гу уз иIэмэ, эндокриннэ системэр тэмэму мылажьэмэ, Iэпкълъэпкъыр махэ зэрыхъур. Ауэ щыхъукIэ, цIыхур лажьэурэ къыхуэнэжа гуащIэр щIэмыкIын, ныкъуэдыкъуэ мыхъун папщIэ, щхьэкуцIым «умылажьэ, щхьэх» жиIэу Iэпкълъэпкъыр къегъэдаIуэ.
КъищынэмыщIауэ, щIэныгъэлIхэм къыхагъэщхьэхукI гъэм и зэманхэм елъыта щхьэхыр. Псалъэм папщIэ, цIыхум витамин хуримыкъуу, и къарур щIэкIауэ гъатхэр къохьэ. Е, гъэмахуэр апхуэдизкIэ хуабэщи, зыри пхузэфIэкIыркъым, уомэх. Къэхутэныгъэхэм къагъэлъэгъуащ дунейр градус 23-м нэхърэ нэхъ хуабэмэ, цIыхум и лэжьэкIэм проценти 4 зэрыкIэрыхур. ЗэрыгурыIуэгъуэщи, нэхъ хуабэху, а процент бжыгъэм нэхъри хохъуэ. Ауэ щыхъукIэ, унафэщIхэм я къалэнщ цIыхур вэгъзэгъыу щылэжьэфын, гъэщIыIэтыIа пэш къыхузэрагъэпэщыну: кондиционер, жьыху щIагъэувэну.
Фырэ Анфисэ.