ШыщхьэуIум и I5-м щегъэжьауэ Адыгэ Республикэм и телевиденэм и унафэщIу ягъэуващ Къэрэшей-Шэрджэсым щыщ журналист цIэрыIуэ Пхъэш Ашэмэз МуIэед и къуэр. Урысей Къэрал телерадиокомпанием и генеральнэ унафэщIым и къуэдзэ Сабитов Рифат АР-м къакIуэри, Пхъэшыр лэжьакIуэ гупым яригъэцIыхуащ. Ахэр хуэзащ Адыгейм и ЛIыщхьэ КъумпIыл Мурат. 
АР-м и ЛIыщхьэм къызэрыхигъэщамкIэ, республикэм и къулыкъущIапIэхэмрэ КъТК-м и Адыгей къудамэмрэ зэгурыIуэныгъэ я зэхуаку дэлъу тыншу зэдолажьэ, республикэм щыпсэухэм хъыбархэр и чэзум лъагъэIэс, дяпэкIи апхуэдэ я зэдэлэжьэныгъэм мыхьэнэшхуэ зэриIэр жиIащ КъумпIылым. 
Урысейм и Къэрал телерадиокомпанием и лIыкIуэм къызэрыхигъэщамкIэ, УФ-м и Президент Путин Владимир къахуигъэув пщэрылъхэм тету УФ-м ис лъэпкъ зэмылIэужьыгъуэхэм я бзэмрэ щэнхабзэмрэ хъумэным йолэжь, абы хуабжьу и нэIэ трегъэт Урысейм и медиахолдингым. 
ЩIыналъэхэм я журналистхэм я лэжьыгъэр нэхъыфIу къызэгъэпэща, къыхалъхьэ проектхэр гъащIэм хэпща зэрыхъуным тепсэлъыхьащ къулыкъущIэхэр. 
КъумпIыл Мурат зэрыжиIамкIэ, нэтынхэр нэхъ купщIафIэ хъун папщIэ ялъэкI къагъанэркъым журналистхэм. Абы папщIэ республикэм зэпеуэ зэмылIэужьыгъуэхэр къыщызэрагъэпэщ. Газетхэм къытрадзэ тхыгъэ нэхъыфIхэр, телевиденэмкIэ, радиомкIэ къат нэтыныфIхэр зи IэдакъэщIэкIхэм республикэм и УнафэщIым и саугъэтыр илъэс къэс хуагъэфащэ.  
Республикэм къыщыхъу-къыщыщIэхэр и чэзум къэтынымкIэ анэдэлъхубзэр хъума, къыдэкIуэтей щIэблэм зэрагъэщIа хъунымкIэ социальнэ мыхьэнэ зиIэ проектхэр пхыгъэкIынымкIэ хэкIыпIэхэр яубзыхунущ дяпэкIи. 
«Адыгей» телерадиокомпанием и унафэщIым жиIащ республикэм и Iэтащхьэм, къулыкъущIапIэхэм къагъэув пщэрылъхэр игъэзэщIэну зэрыхьэзырыр, сэбэпынагъ къызыпэкIуэну сыт хуэдэ Iуэхуми зэрыхуэмыщхьэхынур. 
Пхъэш Ашэмэз МуIэед и къуэр Черкесск къалэм къыщалъхуащ. Илъэс 42-рэ и ныбжьщ. КъТК-м и «Къэрэшей-Шэрджэс» телерадиокомпанием и унафэщIым и къуэдзэу, хъыбарыщIэхэмкIэ и къудамэм и унафэщIу лэжьащ. ИужькIэ КъТК-м и «Ставрополье» телерадиокомпанием хъыбарыщIэхэмкIэ и къудамэм и унафэщIым и къуэдзэу щытащ. 
Ашэмэз и лэжьыгъэм зэрыхуэIэзэмкIэ, журналистикэм и щэху псори зэрищIэмкIэ, телевиденэм къыдэкIуэу, «ютубым» кърилъхьэ «Кавказский характер» нэтынхэмкIэ (цIыху цIэрыIуэхэм ядригъэкIуэкI интервьюхэр) куэдым къацIыхуну хунэсащ, зэкъуэш республикэхэм я жылагъуэ-политикэ гъащIэм жыджэру зэрыхэтым и Iулыджыр еIэт. 
Узыншагъэ быдэ, гупсысэ куу иIэу, лэжьыгъэфI къыдэхъуу куэдрэ лэжьэну дохъуэхъу адыгэ щIалэм.