Налшык къалэм дэт 33-нэ курыт еджапIэм «Зыгъэпсэхугъуэ ин» зи фIэщыгъэ клубым и унафэщIхэмрэ егъэджэныгъэ IэнатIэм зи лэжьыгъэкIэ къыхэща IэщIагъэрылажьэхэмрэ я зэIущIэ иджыблагъэ щекIуэкIащ. Абыхэм Къэбэрдей-Балъкъэрым щылажьэ егъэджакIуэхэмрэ абыхэм я гъэсэнхэмрэ папщIэ IэщIагъэмрэ щIэныгъэмрэ хэзыгъахъуэ Iуэхугъуэ зыбжанэ ирагъэкIуэкIащ.
ЩIыналъэхэмрэ къалэшхуэхэмрэ щыщ егъэджакIуэ пэрытхэм щхьэкIэ къызэрагъэпэща, «Егъэджэныгъэ IэнатIэм пэрытхэм я экспресс» зыфIаща урысейпсо гъущI гъуэгу зекIуэм хэтхэр Къэбэрдей-Балъкъэрым къеблэгъащ, IэщIагъэрылажьэхэми зыIуагъэщIащ. ЗэIущIэм хэтащ Къэбэрдей-Балъкъэрым и къалэхэмрэ къуажэхэмрэ щыщ ныбжьыщIэхэр, колледжхэмрэ университетхэмрэ щIэс студентхэр, егъэджэныгъэ IэнатIэм пыщIа къулыкъущIапIэхэм я IэщIагъэлIхэр, министерствэм и лэжьакIуэхэр.
Зэхуэсым къеблэгъахэм фIэхъус псалъэкIэ захуэзыгъэза, КъБР-м егъэджэныгъэмрэ щIэныгъэмкIэ и министр Езауэ Андзор къыхигъэщащ егъэджэныгъэ IэнатIэм и пщIэр къэзыIэт сыт хуэдэ жэрдэмми пщIэ зэрахуищIыр, дащэщи щIэгъэкъуэн зэрыхъунур. «Къэралышхуэм и щIыналъэ зэхуэмыдэхэм къикIыу ди хэгъэгум къеблэгъа ди лэжьэгъу пэрытхэм фIыщIэ яхузощI IэщIагъэрылажьэм и гукъыдэжыр къэзыIэтын, и щIэныгъэм хэзыгъэхъуэн гуращэкIэ къызэреблэгъам папщIэ. Си щхьэкIэ шэч къытесхьэркъым мы зэIущIэр гукъинэж зэрыхъунум, къызэхуэсахэм ящымыгъупщэн зэрызэхахынум, я IэнатIэм къащыщхьэпэн куэд зэралъагъунум. Къэбэрдей-Балъкъэрыр щIыналъэ дахащэщ, мамырыгъэмрэ зэгурыIуэмрэ щытепщэ хэгъэгущ. ЩIыуэпсым и дахагъэм пэджэж дуней гъэщIэгъуэн къызэ1уах ди егъэджакIуэхэм. Абыхэм я гулъытэр куэдым нос, IэнатIэм Iэджэ щIэщыгъуи щызэрагъэпэщ, егъэджакIуэм и пщIэр къэзыIэт жэрдэм хьэлэмэтхэри къыщыхалъхьэ. Сыщогугъ ди цIыху пэрытхэм я щIэныгъэхэр хьэщIэхэм гъэщIэгъуэн къащыхъуну, къытхуэкIуахэми я гуащIэдэкIыр дыдейхэми щапхъэ яхуэхъуну. ДызыхэпсэукI лъэхъэнэр информацэм и лъэхъэнэщ. ЩIэблэм щхьэпэ яхуэхъуныр абы къыхэтхыфу, фIым хуэдгъэлажьэу зедгъэсапхъэщ. Ар дыдэр къапэщылъщ дыщIэлажьэ щIалэгъуалэми ящIэну. Информациер зэрызэхагъэкI сыт хуэдэ Iэмалми егъэджэныгъэ IэнатIэм дежи щIэныгъэм дежи къызэрымыкIуэу мыхьэнэшхуэ щаIэщ. Гуапэщ зэIущIэм ди гуащIэм зыщIедгъэужь «сабий десантри» къызэрытхэтыр. IитIыр зэрымытхьэщIмэ, зэрыщ1эркъым жыхуиIэращи, дызытепсэлъыхь псори, ныбжьыщIэ щэну, япхъуэтэну сыщогугъ. ФефIэкIуэну, лэжьыгъэфI къефхьэлIэну си гуапэщ», – жиIащ Езауэ Андзор.
ФIэхъус псалъэкIэ зэIущIэм хэтхэм захуигъэзащ КъБР-м щIалэгъуалэ IуэхухэмкIэ и министр Лу Азэмэт. Абы и псалъэр нэхъыбэу ныбжьыщ1эхэм теухуат. Министрым нэхъыжьхэр къыхуриджащ ныбжьыщIэхэм я зэхэщIыкIым зезыгъэубгъу, я дуней лъагъукIэр зыгъэкуу жэрдэмхэр нэхъыбэ ящIыну, къыхалъхьэ гугъэкI псори еджэныгъэм пыщIауэ зэрагъэпэщыну.
«Кавказым и налкъутналмэсу» къалъытэ егъэджакIуэ гупым цIыху 90 къызэщIеубыдэ. МафIэгур Мэзкуу къыщежьэри, Кавказ щIыналъэхэм я щыхьэрхэм къыщыувыIэурэ къыкIуэцIрыкIащ. Апхуэдэу мафIэгур япэщIыкIэ Мейкъуапэ къыщыувыIащ, итIанэ Магас, Нэзрэн, Владикавказ, Грознэ къалэхэм. ПэхуэщIэ дахэм хэтхэм зрагъэлъэгъуащ Дагъыстэным и щIыпIэ нэхъ дахэ дыдэхэм ящыщу Кезеной-Ам жыхуаIэ псыхъурейр, Сулак къуэладжэр, Дербент быдапIэхэр, нэгъуэщI куэди. МафIэгум иужьу къызыдыхьар Къэбэрдей-Балъкъэрырщ. ХьэщIэхэм ирагъэлъэгъуащ Iуащхьэмахуэ, зыщрагъэплъыхьащ ШэджанэкIэ зэджэ гуэл щхъуантIэхэм.
Iуэхугъуэ дахэм ипкъ иткIэ еджакIуэхэм, студентхэм, гъэсакIуэхэм, егъэджакIуэхэм папщIэ мастер-класс зэмылIэужьыгъуэхэр ирагъэкIуэкIащ, зэпеуэхэр зэхашащ, Iэнэ хъурей къызэрагъэпэщащ. Ахэр псори теухуат IэнатIэм хуаIэ щытыкIэр егъэфIэкIуэным, жэрдэмщIакIуэ къахэщIыкIыным, щIэщыгъуэнэкIэ еджэныгъэм ирагъэплъу я Iуэхур хьэлэмэту егъэкIуэкIыным. «Мэзкуу – Мейкъуапэ – Владикавказ – Грознэ – Мэхъэчкъалэ – Налшык – Мэзкуу» гъуэгум ирикIуэ, «Егъэджэныгъэ IэнатIэм пэрытхэм я экспресс» зекIуэм хэтахэм я гуращэр къадэхъуауэ, апхуэдэ зэхыхьэхэр илъэс къэс егъэкIуэкIын зэрыхуеймкIэ зэдэарэзыуэ зэбгрыкIыжащ.
