Мы махуэхэм Псыхуабэ щрагъэжьэжащ «Мэшыкъуэ-2023» зэхыхьэм хэта япэ гупыр. А Iуэхум зыкърагъэхьэлIат УФ-м и Федеральнэ Зэхуэсым и Къэрал Думэм и депутат Бондаренкэ Еленэрэ Ставрополь щIыналъэм и Правительствэм и унафэщIым и къуэдзэ, щIыналъэм финансхэмкIэ и министр Калинченкэ Ларисэрэ.
Калинченкэ къыщыпсалъэм щIалэгъуалэм фIыщIэ яхуищIащ Iуэхугъуэ пыухыкIахэр къызэрыхалъхьэм, абыхэм хэкIыпIэ къызэрыхуагъуэтым папщIэ. Министрым зэрыжиIамкIэ, щIалэгъуалэм утыку кърахьа жэрдэмхэм ящыщ зыбжанэ Ставрополь щIыналъэм щагъэзэщIэну я мурадщ.
- «Мэшыкъуэ» щIалэгъуалэ зэхыхьэм фызэрыщыIэну пIалъэр и кIэм нэблэгъащ, сэ къызолъытэ мыбы хэтахэм фи гъащIэм зихъуэжыну. Фэ ныбжьэгъущIэ куэд, акъылэгъу къывдэхъухэр къэвгъуэтам имызакъуэу, куэд къэфщIащ, фи щIэныгъэм хэвгъэхъуащ. ЕгъэджакIуэхэм щхьэхуэу фIыщIэ яхуэсщIынут: абыхэм яхузэфIэкIащ Iуэхугъуэ куэдым и купщIэр къалъагъуу, и хэкIыпIэу щыIэхэри къыхалъхьэн. Сэ сыхуейщ мы зэхыхьэр гъэщIэгъуэн зыщIа дэтхэнэми фIыщIэ фхуэсщIыну, - жиIащ Ларисэ.
Абы и псалъэхэм къыпищащ Бондаренкэ Еленэ.
- «Мэшыкъуэ» зэхыхьэр сигу ирохь, илъэс къэси сфIэфIу сыкъокIуэ. Гу зылъыстаращи, мы зэхыхьэр илъэс къэс нэхъыфI мэхъу, зеужь. Зызымыхъуэжыр зыщ - мыбы щызэхуэс щIалэгъуалэр хэкупсэщ, ныбжьэгъугъэр зыгъэлъапIэу зи мурадхэр гъащIэм хэзыпщэфщ. Мы гъэм ди къэралым ЕгъэджакIуэмрэ унэтIакIуэмрэ я илъэсу зэрыщагъэувам къыхэкIыу, щIалэгъуалэ зэхыхьэм щызэхуашэсар къыдэкIуэтей щIэблэр зыгъасэмрэ щIэныгъэ езытымрэщ. Си фIэщ мэхъу мыбы зэманыр пщIэншэу зэрыщывмыгъэкIуар. ФыкъэмыувыIэу зывужь. Мурадхэр зыхуэвгъэуви, ар зэрызэвгъэхъулIэнум фыхущIэкъу. Фи зэфIэкIым шэч къытевмыхьэу фыпсэу, феужьэрэкI,- жиIащ депутатым.
Псалъэ гуапэкIэ щIалэгъуалэм захуигъэзащ «Мэшыкъуэ» щIалэгъуалэ зэхыхьэм и унафэщI Пальцев Иван.
- Мы гъэм «Мэшыкъуэ» къэкIуэну хуейуэ цIыху мини 8-м тхыгъэ къытхуагъэхьат, апхуэдиз зэи диIакъым. Ди зэхыхьэм и мыхьэнэ нэхъыщхьэм - къэкIуэнум хуэлэжьэнум - фрищыхьэтщ. ЕгъэджакIуэхэмрэ унэтIакIуэхэмрэ фи пщэм къалэнышхуэ дэлъщ, а Iуэхум къару, зэман ин зэрытевгъэкIуадэм дыщыгъуазэщи, абы папщIэ пщIэшхуэ фхудощI. Ди гуапэщ фи IэщIагъэр евгъэфIэкIуэн мурад дахэ фызэриIэр, - жиIащ Иван.
Япэ Iыхьэр щызэхуащIыжым иращIэкIа пшыхьым зи лэжьыгъэр нэхъыфIу къалъытахэр щагъэнэIуащ. НыбжьыщIэ 17-м сом мелуани 5,8-рэ иратынущ я мурадхэр зрагъэхъулIэн папщIэ. КъищынэмыщIауэ, щIалэгъуалэм щыщу нэхъ жыджэрхэм, Iуэхугъуэ зэмылIэужьыгъуэхэмкIэ къыхэжаныкIахэм тыгъэ хуащIащ.
Щомахуэ Залинэ.