Озгъан орта кюн эрттенликде сагъат жетиде Нальчикни темир жол вокзалына «Педагогика экспресс» деген ат бла энчи состав келгенди. Ол «Уллу перемена» эмда «Уллу» деген коммерциялы болмагъан организацияла бирге къурагъан жолоучулукъду. Ол Россейде Устазны бла насийхатчыны жылыны чеклеринде бардырылады. Къонакъла РФ-ни 55 регионундан 76 адам болуп келгендиле. Ала мында эки кюн тургъандыла эмда ишлегендиле, республиканы айбат, тарых магъаналы жерлерин кёргендиле.

Бахсан тарына, Минги тауну этегине баргъандыла, канат жол бла Гара-Башиге дери чыкъгъандыла.

-Бу биринчи «Педагог экспресс» бир бирибизге иш сынауубуздан юлюш этиуде, аны бла бирге билимни ёсдюрюуге эмда маданият кёз-къарамыбызны кенгертирге да себеплик этген аламат амалды. Дагъыда Ата журтубузну ариу, тарых магъаналы жерлерин кёребиз, жигитлерини, айтхылыкъ адамларыны юслеринден хапарлы болабыз. Ол а ишибизде бек хайырлыды», – дегенди Нижний Новгород областьны Выкса шахарында 3-чю номерли мектепни директору Вера Ботина. Ол айтханнга кёре, жолоучулукъгъа къатышхан устазла «Большая перемена» къурагъан конкурслада хорлагъанладыла, къыралны бек иги педагоглары-практиклерини къауумундандыла. «Ала фахмулу сабийле бла ишлеу, аланы жюреклерине жол таба билиу жаны бла усталыкълары бла да айырмалы болгъандыла»,- деп къошханды.

Эсгертиу: «Уллу перемена» Россейни сабийлерини бла жаш тёлюсюню «Биринчилени атламлары» биригиулерини проектиди. Анга Жаш тёлюню ишлери жаны бла федеральный агентство себеплик этеди. 

Ол кюн тюшден сора уа проектге къатышханла 33-чю номерли мектепге келгендиле. Анда болгъан ишге КъМР-ни жарыкъландырыу эмда илму министри Анзор Езаов, КъМР-ни жаш тёлюню ишлери жаны бла министри Азамат Люев, «Биринчилени атламлары» битеуроссей биригиуню КъМР-де бёлюмюню башчысы Аслан Шипшев, республиканы бийик окъуу юйлерини бла колледжлерини преподавательлери, устазла, окъуучула, студентле да къатышхандыла.

Къонакъланы алгъышлай, Анзор Езаов былай дегенди: «Бизни республикагъа Россейни кёп регионларындан коллегаларыбызны келгенлери бек хычыуун кёрюннгенди. Мында болгъан кюнлеригиз эсигизде бир аламат кезиуча къаллыгъына ишексизме.

Бир бирибизге айтыр, юйретир затларыбыз а бардыла». 

Жюрекден баргъан сёзлерин къонакълагъа Азамат Люев да айтханды.

Тюбешиуню чеклеринде къонакъла мындагъы окъуучула, устазла бла да билим бериу жаны бла мастер-классла къурагъандыла, сёлешиуле бардыргъандыла, соруулагъа жууапла берилгендиле. 

Быйыл устазладан къуралгъан «Кавказны жаухары» деген экспресс да биринчи кере жолгъа атланырыкъды. Анга 90-дан аслам адам киреди. Поезд Москвагъа Адыгея Республиканы ара шахары Майкопда, Ингушетияны Магас , Назрань, Осетияны Владикавказ, Чечен Республиканы Грозный шахарларында да тохтай-тохтай барлыкъды.