Зэхыхьэр хуэунэтIауэ щытащ IэнатIэр ефIэкIуэнымкIэ щыIэ хэкIыпIэхэр убзыхуным, абы ипкъ иткIи щIыналъэхэр лэжьыгъэ и пIалъэкIэ зэхъуэжыным, бжыгъэр зи лъабжьэ технологиехэр IэнатIэм жыджэру къыщыгъэсэбэпыным, цIыхухэм хуащIэ япэ медицинэ Iуэхутхьэбзэхэм я фIагъым хэгъэхъуэным.

- Башкортостаным ехъулIэныгъэшхуэхэр яIэу щагъэзэщIащ щIыналъэм узыншагъэр хъумэнымкIэ и IэнатIэр егъэфIэкIуэнымкIэ проект куэд. Аращ нобэрей зэхыхьэр абы щедгъэкIуэкIыным щхьэусыгъуэ хуэхъуар, - жиIащ Мурашкэ Михаил. – ЦIыхухэм япэ медицинэ дэIэпыкъуныгъэхэр щыхуащIэ IуэхущIапIэхэр къэгъэщIэрэщIэжыным, лышх, гу-лъынтхуэ узыфэхэр зыпкърыт сымаджэхэм зэреIэзэр егъэфIэкIуэным, узыр и чэзум къэхутэнымкIэ, бэм я узыншагъэр къэпщытэнымкIэ программэхэр зэрылажьэр нэрылъагъущ. Абыхэм къищынэмыщIауэ, фIы дыдэу къагъэIэрыхуащ бжыгъэр зи лъабжьэ технологиехэр, абы къарит Iэмалхэм я фIыгъэкIэ сымаджэхэмрэ дохутырхэмрэ я зэпыщIэныгъэр куэдкIэ нэхъ тынш хъуащ. Медицинэм къыхыхьэ IэмалыщIэхэр жыджэру IэнатIэм къызэрыщыдгъэсэбэпыным дыхущIэкъупхъэщ. Ар мыхьэнэшхуэ зиIэ Iуэхущ, сыт щхьэкIэ жыпIэмэ, жылагъуэ узыншэ диIэнымкIэ медицинэм игъуэт зыужьыныгъэм куэд елъытащ. Сэ сыщыгъуазэщ ди къэралым и щIыналъэ куэдым узыншагъэр хъумэн IэнатIэр егъэфIэкIуэнымкIэ лэжьыгъэшхуэ къазэрыпэщылъым. Абы и лъэныкъуэкIэ щапхъэ зытрахын мымащIэу щалъагъунущ Башкортостан Республикэм. Узыншагъэр хъумэнымкIэ IэнатIэм цIыхухэм япэ дэIэпыкъуныгъэхэр щрат и IуэхущIапIэхэм зегъэужьынымкIэ программэхэр зыгъэзащIэ щIыналъэхэм абы и лъэныкъуэкIэ мы щIыпIэм фIы дыдэу зыщыхагъэгъуэзэфынущ лэжьыгъэ и пIалъэ. Дэ псоми ди къалэн нэхъыщхьэщ зэманым дыкъыкIэрымыхуу къэралым и медицинэ IэнатIэр едгъэфIэкIуэныр.

Зэхыхьэм щытепсэлъыхьащ IэнатIэм зыщрихьэлIэ гугъуехьхэм, ахэр зэфIэхынымкIэ щыIэ хэкIыпIэхэм, къапэщылъ къалэнхэмрэ проектыщIэхэмрэ. Гулъытэ нэхъыбэ хуащIу къыхагъэщащ анэмрэ сабиймрэ я узыншагъэр хъумэным жэуаплыныгъэшхуэ хэлъу зэрыбгъэдыхьапхъэр.

Ди республикэм и лIыкIуэу зэIущIэм хэтащ КъБР-м и Правительствэм и УнафэщIым и къуэдзэ Хъубий Марат, республикэм узыншагъэр хъумэнымкIэ и министр Къалэбатэ Рустам, «Росздравнадзор»-м и къудамэу ди хэгъэгум щыIэм и унафэщI Ахъмэт Алим сымэ.