КЪЭРЭШЕЙ-ШЭРДЖЭС. Республикэм щагъэлъэпIащ Физическэ щэнхабзэм и махуэр. Абы ехьэлIауэ екIуэкIащ «Спортым и хэку» урысейпсо марафоныр,  спорт­сменрэ  ар фIыуэ зылъагъухэу 300-м щIигъурэ зэхуэзышэсар.  
 
«Къэрэшей-Шэрджэсым щып­сэу­хэр, спортымрэ гъащIэ узыншэмрэ дихьэххэр щызэхуэсащ «Нарт» стадионым, къэралым и спорт махуэшхуэ нэхъыщхьэр ягъэлъэпIэну. Гуапэщ ди спортсменхэм ехъулIэныгъэ лъагэхэр урысейпсо, дунейпсо  зэхьэзэхуэхэм зэрыщызыIэрагъэхьэр. Спортым зезытхэр, физическэ щэнхабзэр  зи гъащIэм и Iыхьэ зыщIхэр республикэм илъэс къэс нэхъыбэ щохъу», - щитхащ КъШР-м и Iэтащхьэ Темрезов Рашид и Telegram-каналым.
Республикэм и Iэтащхьэм къыхигъэщащ спортымрэ физическэ щэнхабзэмрэ зегъэужьыным Къэрэшей-Шэрджэсым гулъытэ хэха зэрыщыхуащIыр. Яухуэ иджы­рей мардэм къитIасэ спорт утыкухэр, физкультурэ-узыншагъэр щрагъэфIакIуэ комплексхэр, даIыгъ спортсменхэмрэ абыхэм я тренерхэмрэ.   
Спорт махуэшхуэр ирагъэкIуэкIыным теу­хуа Iуэхум зыщIагъэкъуащ КъШР-м  Мэкъу­мэш хозяйствэмкIэ, СпортымкIэ и министерствэхэм,  «Спортым и хэку» урысейпсо марафоным хыхьэу.