«Динамо» урысейпсо физ­куль­турэ-спорт зэгухьэныгъэр къы­зэрызэрагъэпэщрэ илъэсищэ зэрырикъум и щIыхькIэ хаб­зэхъумэ-динамовецхэм ящыщ гуп Европэм и щыгу нэхъ лъагэ Iуащхьэмахуэ дэкIащ. 

Экспедицэм хэтащ Урысей Федерацэм и щIыналипщIым щыщхэр, Беларусь Республикэм и лIыкIуэхэр. 
Гупым хэтхэм я узыншагъэр махуэ зыбжанэкIэ къапщытащ. Бгы­лъэхэм дунейр къы­щы­зэIыхьэмэ теухуа епсалъэри, ящIап­хъэм, альпинистхэр жэ­щым техьащ къыхаха маршрутым икIи нэхущым ирихьэлIэу Урысеймрэ Беларусымрэ я къэрал ныпхэр, «Динамо» ВФСО-м и бэракъыр щыгум щагъэхуэрзащ. 
 Командэр кърагъэблэгъэжащ «Динамо» урысейпсо зэгухьэныгъэм и унафэщI генерал-лейтенант Гулевский Анатолий, «Динамо» ВФСО-м и унафэщIым и ­чэнджэщэгъу Рудый Анатолий, ап­хуэдэуи къэрал кIуэцI Iуэху-хэмкIэ министру КъБР-м щыIэм и ­къалэнхэр пIалъэкIэ зыгъэзащIэ, полицэм и полковник Мамхэгъ Назир сымэ. 
- Нобэ фи сатырым хэтщ динамовец лъэщхэр, дунейпсо чемпионхэр, Олимпиадэхэм я призерхэр, зэхьэзэхуэ зэмылIэужьы­гъуэ­хэм хэтахэр. Ахэр псори ­хабзэхъумэ органхэм я лэ­жьа­кIуэщ. А командэр дэкIуеящ ­Iуащ­хьэмахуэ. ФIыщIэшхуэ фхузощI! - жиIащ Гулевский Анатолий. 
Псалъэ гуапэкIэ абыхэм захуи­гъэ­защ Мамхэгъ Назири.
- ЛIэщIыгъуэ псо хъуауэ «Динамо» зэгухьэныгъэм егъасэ цIыху телъыджэхэр, дуней псом щы­цIэ­рыIуэ спортсменхэр, Олимп             джэгухэм щытекIуахэмрэ и            призерхэмрэ, дуней псом, Европэм я чемпионхэу ди къэралышхуэр зэ­рыгушхуэхэр. Иребагъуэ адэкIи а ехъулIэныгъэхэр къызыдэкIуэ хабзэ дахэхэр, текIуэныгъэхэр, динамовецхэм я спорт зэфIэкIым хрырехъуэ икIи лъагапIэщIэхэм фынэсыну си гуа­пэщ.
- Гупым хэта дэтхэнэми фIыщIэ хузощI икIи сыщогугъ псори дызэщIыгъуу адэкIи лъа­га­пIэхэм дыдэкIуеифыну, - къыхигъэщащ Беларусым и «Динамо» ФСО-м и унафэщIым и  къуэдзэ Богда­нович Александр. 
Iуащхьэмахуэ дэкIахэм ира-тащ «Динамо» ВФСО-м и сертифи­катхэмрэ фэ­еплъ саугъэтхэмрэ. «Динамо» зэгухьэныгъэр илъэ-си 100 ирокъу» фэеплъ медал-хэр хуагъэфэ­-щащ Беларусым и «Динамо» Физ­культурэ-спорт                зэгухьэныгъэм и лIыкIуэхэм. 
«Динамо»-м хэлъхьэныгъэш­хуэ зэрыхуищIам, щэнхабзэмрэ спор­тымрэ зегъэужьыным ехьэ­лIауэ иригъэкIуэкI лэжьыгъэм пап­щIэ ЩIыхь тхылърэ «Динамо» зэгухьэныгъэр илъэси 100 иро­къу» медалымрэ къыхуагъэ­фэщащ а зэщIэхъееныгъэм ­КъБР-м щиIэ къудамэм хабзэ-хъу­мэхэр зыхэт и командэм. 

Зыгъэхьэзырар
УЭРДОКЪУЭ  Женящ.