Орта билим бериу учрежденияланы тамата курсларыны студентлери сабий садлада бла башланнган класслада окъутургъа эркин этилгендиле, цифралы сомну кючю. Бу статьяда августда кючюне энтта къаллай законла киргенлерин билдирирге сюебиз.

Медицина

Быйыл 24 июльдан кючюне кирген законнга тийишлиликде, медицина организациялагъа эркеклик, неда тиширыулукъ болумларын алышындырыугъа бурулгъан операциялагъа чекле салыннгандыла. Аланы жаланда адамны саулугъуна кёре, сабийде бир тюрлю къыяуну кетергенде   этерге жарарыкъды. Аны юсюнден оноуну медицина комиссия чыгъарлыкъды.

Эркеклигин алышхан адам энди сабийни юйюрюне алыргъа, анга осуйлукъ этерге эркин тюйюлдю. Андан сора да аллай инсанны юйюр къурамыны юсюнден документини кючю да тохтатылады.

Законну жарашдыргъанланы акъылларына кёре, алай бла юйюрню даражасы ёсдюрюледи, тёрели хазна сакъланады. «Тыш къыраллада аллай операцияланы саны ёсюп барады, ол а жамауатны бузулгъанына шагъатлыкъ этеди. Россейде аны къояргъа ахырда жарамайды», - деп белгилегендиле парламентарийле.

Билим бериу

Орта профессионал билим берген учрежденияланы тамата курсларыны студентлери сабий садлада, неда школланы башланнган классларында устазлыкъ эталлыкъдыла, кружокла бардыраллыкъдыла. Вузланы студентлери уа окъутуу-юйретиу усталыкъла бла кюрешаллыкъдыла, университетледе бла илму организациялада илму къуллукъланы толтураллыкъдыла.

Алай бла законла жарашдырыучула школлада кадр сорууну тамамларгъа онг боллугъун айтадыла. Ол а бютюнда элледе магъаналыды. Устаз ауруса, неда солуугъа кетсе, аны алышындырыр адам болмай къалыучуду. Аны бла бирге жаш адамланы диплом да алгъынчы сынамлары, урунуу китапчыкълары да боллукъду.

Финансла

1 августдан башлап, цифралы сом бла хайырланыргъа боллукъду. Бу жангы амал бла Россейни Банкыны информация системасында хайырланыргъа жарарыкъды. Бу операцияланы къоркъуусузлугъун да ол жалчытырыкъды.

Коррупция аманлыкъ ючюн жууапха тартылгъанны жеринден тепдирилмеген ырысхысын сатаргъа, алай бла къырал бюджетни толтурургъа эркин этилгенди. Сёз коррупция аманлыкъ этилип алыннган мекямланы, неда законлу болуму ачыкъланмагъан объектлени юслеринден барады. Алгъын аллай мекямланы жаланда къыралны социал кереклерине хайырланыргъа жарагъанды.

Законлагъа тийишлиликде, коррупция бла байламлы аманлыкъланы чеклеринде конфискациягъа тюшген мюлкню сатыудан тюшген ахча РФ-ни Социал страхование фондуна бериледи.

Организация, предприятие банкрот халгъа жетсе, техноген эмда экология хатаны болдурмаз ючюн тёлеуле биринчилени санында изленирикдиле. Бу борчну башха кредиторланы излемлеринден алгъа тамамларгъа керек боллукъду. Бу закон кючюне 24 августда кирликди.

Къоркъуусузлукъ

Тыш къыраллы агент бла байламлыкъла жюрютген кезиуде законлада белгиленнген чеклени толтурургъа керекди. Тыш къыраллы агентледе эмда алагъа болушханлада пландан тышында тинтиуле бардырыргъа эркин этилгенди. Аны бла бирге РФ-ни Юстиция министерствосуну тыш къыраллы агентни юсюнден законланы толтурмагъаны ючюн эсгертиулерин сакъламагъанлагъа тазир салынырыкъды – 300 минг сом.

Таксилени, автобусланы, троллейбусланы, трамвайланы водительлери 1 сентябрьге дери алагъа сюд этилмегенини, неда уголовный иш ачылмагъаныны (тохтатылгъаныны) юсюнден справканы кёргюзтюрге керекдиле. 31 августдан кючюне кирлик федерал законнга тийишлиликде, ауур эм артыкъда ауур аманлыкъла этген инсанлагъа пассажирлени жюрютюу бла кюреширге жарарыкъ тюйюлдю.

Тикаланы Фатима хазырлагъанды.