Лышх узыфэхэмкIэ Ростов къалэм дэт щIэныгъэхутэ IуэхущIапIэм и дохутыр Аушевэ Татьянэ метр 7000-м щIигъу, Лениным и цIэр зезыхьэ Iуащхьэм дэкIащ.
Дохутыр, щIэныгъэлI, онколог цIэрыIуэ, медицинэ щIэныгъэхэмкIэ кандидат Аушевэр Къыргъызым щыIэ Памирэ къуршым и Iуащхьэ хъыжьэхэм ящыщ зы къызэрихьэхуам щыгуфIыкIащ къыдэлажьэхэмрэ Iыхьлыхэмрэ. Сыту жыпIэмэ, а Iуащхьэр апхуэдизкIэ задэщ, лъагэщ, гугъусыгъущи, альпинист нэхъ лъэрызехьэ дыдэхэми къохьэлъэкI, абы щыхуу къахуэмыгъуэтыжахэри мащIэкъым. ИкIи абы удэкIын папщIэ, жыр Iэпкълъэпкъ, узыншагъэ быдэ, гукъыдэжышхуэрэ хахуагъэрэ уиIэн хуейщ.
КъызэрыщIэкIамкIэ, Аушевэм и щIэщыгъуэкъым Iуащхьэ дэкIыныр. Абы къихьэхуакIэщ Фыщт, Надеждэ, Советскэ, Юхиным и Iуащхьэ, Iуащхьэмахуэ, Гималайм щыIэ Тсерко Ри, Африкэм щыIэ Тубкаль, нэгъуэщIхэри. Гу лъытапхъэщ: Лениным и лъагапIэм дэкIыф альпинистхэм я проценти 5-р бзылъхугъэщ.
- ИлъэситIкIэ зыхуэзгъэхьэзыращ сэ мы Iуэхум. Си мурадыр къызэхъулIэн папщIэ, лэжьапIэ нэужьым махуэ къэс спортзалым сыкIуэрт. Хьэлъэшхуэ къэсIэту, махуэ къэс гимнастикэм селэжьу, лъакъуэрыгъажэм куэдрэ сытесу, тхьэмахуэм зэ лъакъуэрыгъажэкIэ километр 90 зэпысчу… КъищынэмыщIауэ, скалодромым тхьэмахуэм 3 сыкIуэрт. Iэпкълъэпкъым и закъуэ мыхъуу, бэшэчу, набдзэгубдзаплъэу ущытыпхъэщ, шыIэныгъэ пхэлъын хуейщ бгым удэкIын папщIэ. УзыдэкIыну бгым и лъапэм тхьэмахуитI-щыкIэ ущыпсэун хуейщ, абы и хьэуам уесэн папщIэ. Лъышэр къомэщIэкIмэ, псынщIэу уош, уи щхьэр мэуз, ар уи гум къытохьэлъэ, уи Iур йогъущыкI, ныбажэ уохъу, укъожь. А псоми дыкъыпекIуэкIын папщIэ, си гъусэу Iуащхьэм дэкIа къыргъыз щIалэмрэ сэрэ метр 3600-м, 4400-м, 5400-рм, 6100-м деж щаухуа лагерхэм чэзу-чэзукIэ дыщыпсэуащ, Iэпкълъэпкъыр лъагапIэм есэн папщIэ. ИтIанэ, и лъапэ дыдэм дыкъехыжри, дыкъызэтемыувыIэу Iуащхьэм дыдэкIыну дежьащ. Дунейм и щытыкIэм псынщIэ дыдэу зызэредзэкI: Iуащхьэм и щыгум дынэсыху жьапщаеми, уэсми, дыгъэ жьэражьэми, уэлбанэми зыкъыдагъэлъэгъуащ. Зэм мылым дытету, зэм ятIэм дыпхрымыкIыфу, зэми хуабэм дызэримыгъакIуэу, гъуэгуанэ хьэлъэ зэпытчащ. Лениным и лъагапIэм упэлъэщмэщ, абы ипэ узыдэкIа псори тыншу къызэрохъулIар къыщыбгурыIуэр. Псалъэм папщIэ, метр 6700-м дыщынэсам щыгъуэ, е зыкъэдгъазэу дыкъехыжын е адэкIэ дыдэкIуейуэ ажалым дыпэщIэувэн хуейуэ хэплъэгъуэ хъуащ ди Iуэхур. Сэ сыдохутырщ, сымаджэ куэд къысщогугъ. Си гъусэр альпинист Iэзэщ, текIуэныгъи ажали къуршым щилъэгъуауэ. Ауэ щыхъум, дызэчэнджэщри, щыгум дынэсыным метр 534-рэ фIэкIа къэмынэжауэ, дыкъехыжащ, - жеIэ Аушевэ Татьянэ.
Здынэса лъагапIэм деж Лышх узыфэхэмкIэ Ростов къалэм дэт щIэныгъэхутэ IуэхущIапIэм и ныпыр тригъэуващ Аушевэм. Дохутырыр абдеж къыщызэтеувыIэну и мурадкъым, ар метр 8000 лъагапIэхэмкIэ маплъэ…
