Нальчикни солуу паркыны аттракционларында халкъ не заманда да кёп болады, жай кезиуде уа аланы жокълагъанла бютюн асламдыла. Сабийле тюрлю-тюрлю гыллыучалада, жалгъан кёлчюкде жюзедиле, абаданла терек салкъынында олтуруп, аланы сакълайдыла, мороженое ашайдыла.
Паркда кёпден бери болмагъан адам анда болгъан тюрлениулени эслемей къоярыкъ тюйюлдю:шинтикле алышындырылгъандыла, жангы терекле, юлкюле да орнатылгъандыла. Японлу сакура тереклени ортасындагъы жаяу жолчукъ да бек хычыуун кёрюнеди. Гюл бахчала да жарыкъ бет алгъандыла. Мында аланы кёп тюрлюлери ёсюп, кёзню къууандырадыла. Лермонтов орамдан кирген жерде жашил сагъат да башха тюрлю жарашдырылгъанды.
Жай кюнле мында байрамчадыла. Абаданлагъа бла гитчелеге кёп тюрлю жубанч ишле бардырыладыла. Аланы араларында маданият эмда спорт бла байламлыла да кёпдюле.
Кёпле канат жол бла «Сосрукъгъа» дери чыгъып, башындан Нальчикге къарайдыла. Андан шахар тюз да къол аязынгдача кёрюнеди. Кёллени жагъаларында солугъанла да бек кёпдюле. Ала топ ойнайдыла, сууда къайыкълада бла катамаранлада жюзедиле.
Суусап ичер, ауузланыр жерле да кёпдюле. Алада хычинле, бёрекле, локъумла, башха ашарыкъла бла сыйлар, айран, татлы эмда гара суула бла суусапны къандырыр онгла бардыла.
Ара шахарыбызны башха тийрелеринде паркла, скверле да сабийле, ойнап, зауукълукъ табарча, абаданла уа ырахат олтуруп солурча жарашдырылгъандыла.
Эсгертиу: шахарны битеу паркларында жумушланы багъалары бир къауумлагъа, ол санда кёп сабийли юйюрледен чыкъгъанлагъа эмда ёксюз сабийлеге, учузлай сакъланадыла.
Холаланы Марзият.