«Alpindustria Elbrus Race» фестиваль Минги тауну тийресинде быйыл бла 11-чи кере бардырылады. Бу жол анга 2100 адам къатышханды. Кеслерин сынаргъа, россейли спортчуладан сора да, Белоруссияны бла Къазахстанны келечилери да келген эдиле.
Фестивальны бардырыуда болушлукъ этген «Кавказ.РФ» акционер биригиуню таматасы Андрей Юшманов билдиргеннге кёре, бери спортчула бла бирге аланы танышлары да келгендиле, кёпле юйюрлери бла окъуна да.
– Алай бла 6 августда «Эльбрус курорт» беш мингнге жууукъ адамгъа къонакъбайлыкъ этгенди. Бу шарт а курортха россейлилени сейирлери жаланда къыш кезиуде угъай, сау жылны ичинде да болгъанын кёргюзтеди, – деп чертгенди ол.
Тёрели фестивальны юсюнден айтханда уа, бу жол лыжачыла Минги тауну этегинде саулай да 360 километрни ётгендиле. Бек узун жол а тауну тёгереги бла бара эди – 135 километр чакълы бир.
Таугъа чабып чыгъыу жаны бла эришиуле экинчи кюн болгъандыла – Азау таладан Гара-Башына дери. Аны узунлугъу 6,5 километр чакълыды. Анга 346 адам къатышханды.
«Кавказ.РФ» АО-ну баш директоруну орунбасары, КъМР-ни Тау лыжа спортдан бла сноуборддан федерациясыны таматасы Беккаланы Хыйса белгилегеннге кёре, спорт эришиу бийик даражада ётгенди. «Аны битеу къонакъла да белгилегендиле. Озгъан солуу кюнледе болмагъанча кёп адам бар эди курортда. Къонакъ юйле толу эдиле. Быллай эришиуле республиканы туризм жаны бла айныууна себеплик этедиле деп, оюмум алайды. Саулай жылны ишлеп туруу – бек аламатды. Сёз ючюн, октябрь айда биз тау лыжачылагъа бла сноубордчулагъа къонакъбайлыкъ этерикбиз. Ала мында жарау этиулерин бардырлыкъдыла. Артда февральда уа Россейни чемпионатын ётдюрюр муратлыбыз, – деп билдиргенди ол.
Таппасханланы Аминат.
