РФ-ни МЧС-ини КъМР-де Баш управлениясыны пресс-службасы билдиргеннге кёре, жылны башындан бери республикада къаураны кюйдюрюуню сылтауу бла 265 кере от тюшгени эсепге алыннганды. Озгъан кюнледе уа от ёчюлтюуге алты кере чыгъаргъа тюшгенди.
Битеу быллай болумланы баш сылтауларындан бири – эссизликди. Кёпле сагъыш этмейдиле ёчюлтмей къойгъан тютюнден бла отдан къаллай уллу хата чыгъарыгъын. Тёгерекдеги ханс бу къызыу кюнледе, аз желчик ургъанлай, терк окъуна къабынып къалады. Андан а от юйлеге, ишчи жерлеге жетерге болады.
МЧС саулай къыралда от тюшерге къоркъуу болгъан тийрелени тохтаусуз тинтгенлей турады. Къабарты-Малкъарда аллай экисин тохташдыргъандыла.
Къургъакъ хансны кюйдюрюп, къоркъуусузлукъну жорукъларын бузгъанла административ жууапха тартыладыла. Дагъыда ала тазир тёлерге да боллукъдула: инсанла 10-20 минг сом, организацияла бла предприятияла – 30-60 минг, энчи предпринимательле – 60-80 минг сом. Юридический организацияла уа 400-800 минг сом тёлерге борчлу боллукъдула, аманлыкъ ишлери тохташдырылса. Жылны аллындан бери аллай 14 протокол жарашдырылгъанды.
Къасымланы Аминат.