ШыщхьэуIум и хьэуа щIыIэтыIэ къабзэм и мэр зэуэ къыпIурехьэ, дунейр бжьыхьэ хуэплъэ зэрыхъуар зыхэпщIэу. Мы махуэхэм уэру къыпылъэлъыжащ бзиихум и гъэгъахэри. Ахэр мазитI-мазищкIэ жыгым пиIыгъэщ, абыхэм къапих фоумэр дэнэкIи къыщыпщIихьэу. Иджыпсту ахэр жыг лъабжьэхэм гъуэплъыфэу щызэтрихьащ, тхьэмпэ фIэкIа умыщIэу.
ХьэтIохъущокъуэм и жыг хадэм укъыфIэкIмэ, бзиихухэр нэхъыбэу здэщыIэр Налшык и къалэкумрэ «Горнэ» хьэблэмрэщ. Ахэр псори жыгышхуэ защIэщ, ныбжь зэра-Iэр къапщIэу. Мы зэманым, пщэдджыжьым жьыуэ, дыгъэр къэмыплъ щIыкIэ, коммунальнэ хозяйствэм и лэжьакIуэхэм гъэгъа гъуэлахэр зэщIакъуэ жьыбгъэ уэр кърихуу IэкIэ ягъэлажьэ IэмэпсымэхэмкIэ.
Бзиихухэм пIалъэкIэ къазэрыкIэрыху щыIэкъым тхьэмпэ гъуахэр япэу къызыпы-лъэлъ шыкIуртIымейхэри. ЗэрыфщIэщи, ахэр ди щыхьэрым щыкуэдщ. Ахэр щыфлъэгъунущ къалапщэм къыщыщIэдзауэ къалэкIэм нэсыху. Зэман ипэкIэ абыхэм цIыхухэр тегузэвыхь хъуат, пасэу я пщIащэхэр къызэрегъухым къыхэкIыу, арщхьэкIэ адрей къыкIэлъыкIуа илъэсхэм къагъэлъэгъуащ абы и щхьэусыгъуэр - хуабащэу екIуэкIа гъэмахуэхэм я зэран мащIэу къекIыу арат. Налшык имызакъуэу, Кавказ Ищхъэрэм и адрей щIыналъэхэри гугъу дехьащ а Iуэхум, ар къызыхэ-кIар къагурыIуэху, уеблэмэ Ставрополь къалэм и коммунальнэ хозяйствэм и лэжьакIуэхэм къыхалъхьат абыхэм псы щIэгъэлъэдэн хуейуэ. Зы щхьэкIи къэмынэу, шыкIуртIымхэр хъугъуэм носри, къапыкIа жылэ дыщафэхэр дахащэу къыщIолъэлъэж. Абыхэм зыкIи зэран къахуэхъуркъым тхьэмпэхэм нэхъ пасэу къыпыхун зэрыщIадзэри.
Къапщтэмэ, Кавказыр зи лъахэу къалъытэ шыкIуртIымейр жыг къызэрыгуэкIкъым. Ар зэрыдахэм имыза-къуэу, и быдагъкIэ жыгейр къыкIэщIыхьэркъым. Жыгым хэлъ таннид пкъыгъуэхэм я фIыгъэкIэ абы пхъэр зыгъэщ Iэгъэбэгу лIэужьыгъуэ нэгъунэ зэран хуэхъуркъым. Зэман жыжьэкIэ дызэIэбэкIыжмэ, хы ФIыцIэм и Iуфэм щыпсэуа адыгэхэм я унэхэр къызыхащIыкIыу щытар шыкIуртIымейрщ, абы хуэдэу псыIагъым пэщIэтыф нэгъуэщI пхъэ лIэужьыгъуэ зэрыщымыIэм къыхэкIыу.
Коммунальнэ хозяйствэм и лэжьакIуэхэм япэ пщIащэ къыпыхухэр зэщIэкъуэным ехьэлIа лэжьыгъэхэр яублащ бзиихухэмрэ шыкIуртIымейхэмрэ я тхьэмпэ гъуэлахэм- кIэ.